RETHEIHNA IN A NGAM LOH RAMESH GHOLAP 'IAS'
Ramesh Gholap, Ramu ti-a hriat hlawh zawk hi Mahagoan, Solapur district, Maharashtra ah lo piang in naupang fing tak mai a ni a.
A pa hming chu Gorakh Gholap niin cycle chhe tawh siamthat hna a thawk thin a. Hna hniam tê mah nise, chhungkaw enkawl a ngaih miau avangin duhthlan tur dang a nei chuang lo.
Chhungkuaah nihna pawimawh tak chelhtu a nih zia hre reng chungin Zu a in reng thin a. Chu chuan nghawng tha lo tak nei in, hna thawk chhunzawm theilo khawpa buaipui ngaiin a awm chhunzawm a.
Pa berin hna a thawh theih tâk si lo ah chuan. Nu ber Vimal Gholap chuan eizawnna tur ngaihtuahin khaw thenawmah te chuan a kal kual thin a. A hnuah ngûn (bangles) zuar a eizawng turin thutlukna a siam ta a. Tichuan khaw thenawmah te chuan theih ang angin chhungkaw enkawl nan a zuar kual thin a. Hetihlai hian Ramu ke veilam chu polio natna vangin, a hmang thei lo a. Chuti chung chuan an unauin a Nu hnathawh chu an pui ve thin a.
Mahagaon ah hian primary school thleng bak zirna in a awm loh avangin zirna chhunzawm zel turin Barshi lamah mi ina khawsak pawh inhuamin an khua chu a chhuahsan ta a.
"Zirna chauh hi retheihna atanga min khai chhuak theitu leh kan chhungkua min suihkhawn theitu ni-a ka hriat avangin, ka theihna zawng zawng nen lehkha ka zir thin"
Class 6 a zir laiin competition ah lawmman pakhatna a dawng a. Ramu mizia thatna leh thuawihna chuan an zirtirtu te thinlung a khawih hle a.
Kum 2005 a lo her chhuak a, hemi kum hi class 12 a zir kum tak niin. Exam a hmachhawn mek laiin chanchin duhawm lo tak mai a dawng a. A pa chuan dam reng turin chakna a nei ta lo. Hreawm pawh pawiti lo va rim taka hna a lo thawhna rah, seng tura exam a hmachhawn mêk laia chanchin duhawm lo tak mai a hriat chuan hriatthiam har a ti hle. Mahse, thil thleng tur chu a thleng vek tawh si. A pa ruang nang hman tura haw dan tur kawng a dap ta thuai a. An khua thlen nan bus fare cheng 7 a ngai a mahse, rualbanlo a nihna zarah cheng 2 chauhin a thleng thei nachungin. Cheng 2 chauh pawh a nei si lo.
An thenawmte khawngaihna dawngin bus fare tur an lo pai ve a tichuan, an khua chu a va thleng thei hram a.
A pa thih hma chiahin chemistry subject ah exam a hmachhawn a. Subject dang erawh a exam ta lo a ni. A nu ngenna angin exam hmachhawn turin a lêt leh a. A exam tha thei meuh lo. Final exam turin thlakhat chauh a awm tawh tihin an zirtirtute atangin chemistry subject ah mark 40 passed mark a nih laiin mark 35 chauh a hmuh phak thu a hre zui leh ta bawk nen, tawpsan mai duhna thinlung te a nei hman hial a. Mahse, an zirtirtute chuan lo hrethiamin exam that leh an phalsak hlauh mai, a exam that leh chuan 88.5% lai a score zui ta a ni.
Hna neih thuai a duh luatah regular taka College kal chhunzawm ai chuan D.Ed (Diploma in Education) zir chhunzawm a thlang ta zawk a tichuan Dl.Ed zir pah tho si chuan Open ah BA a zir pah bawk a. A duhthusam ang ngei chuan Dl.Ed leh BA a passed ve a. Chumi hnu rei vaklo ah zirtirtu hna pawh a hmu chhunzawm nghal a, chhunkaw enkawl nan chuan tawk viau mah sela, a aia sang zawk a la tum ta fan a.
Ramu hian dikna leh rinawmna hi a ngaisang thin hle a, chutia hna avanga khawpui lama an awm hnu chuan. Sawrkar hnathawk zinga eirukna hluar em em mai te chu a hmu thiam chho tan a. Chhungkaw harsa zawk te tana khawnvartui leh buhfai sawrkar scheme hnuaia sem tur mahse, mi thenkhat duhamna vanga hralh sum a an chantir te chu, a lungawi thei mawlh lo.
A zir thlen chinah a lungawi vak lo ni ngei tur a ni. College a kal tha leh a, hemi kum pawh hian student union leh pawl hrang hrangah hruaitu nihna a chelh ta zel a. Hruaitu a nihna angin sawrkar office te dawr an ngai ta fo a, chuta tang chuan ngaihtuahna thar a nei a. Officer te thuneih zia leh ram siamthat kawnga an pawimawh zia te ava hmuhin. Mipuite tana tangkai thei turin Dept pakhata officer nih ve ngei a tum ruh ta tlat a.
Kum 2009 September ah Vimal-i chuan Self Help Group atanga loan tlema zawng a hmuh ve chu, a fapa UPSC exam inbuatsaihna turin a hlan ta vek a. Ramu pawh phûr takin Pune lama coaching kal turin a inbuatsaih ta a.
UPSC a hmelhriat hmaa Ramu thusawi :
“Thingtlang lamah ka khawsak tam avangin Pune ka kal hma hian MPSC awmzia takngial pawh ka hre lo, UPSC phei chu ka hrethiam lo leh zual. Pune ka thlen tirha ka tih hmasak ber chu coaching centre pakhata an zirtirtu Atul Lande chu hmuin 'UPSC exam turin ka fit tawk em?' He zawhna hi ka zawt hmasaber a ni. Chumai ka la duhtawk lo zawhna tam tak lehkhapuan ah ziakin min chhan sak turin ka ngen zui ta bawk a. Ka bangbo mai bakah ka mawl zia hre reng chungin Mr. Atul Lande chuan ti hian min hrilh a "UPSC exam inziak tling tur hian eng harsatna mah hian an dang thei lo ang che", ti-a min lo fuihna thu tawite khan chakna thar min pe a. Tun dinhmun ka thlen theih chhan ah ka ngai" tiin a sawi nghe nghe a ni.)
Note : Hmanni min rawn betu pakhatin IAS ni tur chuan lehkhabu 70 vel thiam vek a ngai tiin kan zirtirtu ten min hrilha, tih thu min rawn hrilh kha ka hrechhuak zawk mai. Mizo te hian engkim mai hi kan sawi uar mah mah thin.
Ramu chuan a vawikhat nan Kum 2010 May thla khan UPSC exam a hmachhawn ve a. Mahse, a failed chiang kher mai. Hemi kum vek hian an khuaah Panchayat election an neih dawn a. A thian thenkhat te sawmna angin, thianho tang-rualin Ramu-a Nu tlin tir dan an ngaihtuah zui a. Chutah pawh chuan an hlawhchham zui ta tho a ni.
UPSC exam leh election ah tling zo lo mah se, beidawn mai a la tum lo hle a. Result an puan atanga ni rei vaklo hnu chuan an khaw mipuite hmaah thu sawiin "kan khua hi ka chhuahsan dawn a, officer lian tak. Engkim siamtha thei dinhmuna ka din hma chuan ka rawn lêt tawh lo ang", tiin khawpui lamah cho-na thar hmachhawn turin an khua chu a chhuahsan ta a.
Hemi ni atang hi chuan Ramu-a dang thei tur khawpa buaina liantham engmah a awm lo. A hna thawh mek zirtirtu hna chu bansan in State Institute of Administrative Careers (SIAC) hnuaiah exam a hmachhawn ve a, vanneihthlak takin a inziak tling hlauh mai. Exam a tlin zarah Hostel a awm tur leh scholarship dawng thei tura thlan chhuah te zingah telh ve a ni a.
Hostel a awm hnu pawhin eizawnna dang a la ngaihtuah zel a. Inhlawh pah in theih ang tawkin a inbuatsaih thin a.
Kum 2012 a lo thlen meuh chuan regular class pawh kal pha lo, open university atanga zir chhuak sum leh pai lamah pawh thiante hmuhsit thin. Coaching class pawh kal pha ve lo. Chu pa ngei chuan All India Rank ah 287 hmuin IAS a inziak tling ta.
IAS nihna a sual chhuah hnu 2012 May thlaah an khaw mipuite hnena a lo tiam tawh ang in, Officer nihna sang tak nen an khuaah chuan a va let leh ta a.
An khaw mipui te thinlungah chuan hmana a lo tiam tawh zawng zawng kha a la cham reng a. Hlimna mittui nen dinhmun sang tak thlen hnu pawha mahni khua theihnghilh ngailo tlangval huaisen chu an lo hmuak a. Sawisel leh demna lam engmah a leng lo.
See me @ click
IAS nihna a sual chhuah ringawt pawh khaw mipuite tan lawmna a tlin tawh tehlul nen, Maharashtra Public Service Commision (MPSC) Result a lo chhuak zui a. Ramu chuan mark 1800 ah 1244 hmuin topper nihna a hauh pha tih an hre chhunzawm leh thuai a. Ramu tan tak pawh hian a va lawmawm dawn em, hun harsa tak tak paltlang fo mah sela, hlawhtlinna dinhmun hruai thlengtu mai an ni si a.
Ramu nu Vimal Gholap thusawi :
"Lehkhathiam te hi ka ngaisang em em a chutiang dinhmuna din ve ka chak thin mahse, chhungkaw enkawl ka ngaih avangin kei atan chuan tihngaihna a awm lo. Mahse, fapa ka nei alawm tiin ka fapa tan theitawp ka chhuah thin a, tunah chuan officer nihna sang tak a sual chhuak ve ta", tiin a fapa chu a chhuan thu a sawi mawlh mawlh mai a ni.
A hlawhtlin hnu chuan tunhmaa alo dream thin thalaite tana hmahruaitu nih chu a tum chho ta a. Thu ziak leh thusawi lamah te tran la in zirlaite fuihna kawngah nasa takin tan a la thin.
Ramesh chuan dikna a ngaisang thin.
“Khawpui chhung thenkhatah mipuite chan tur khawnvartui leh buhfai black a an hralh ka man sak te hian, ka naupanlaia lehkhazirna tur êng nei lova kan awm lai leh buhfai eitur nei mumal lova kan awm lai te kha ka hre chhuak fo thin. Hmeithai tanpui ngai ka hmuh te hian ka nu kha ka hrechhuak fo thin ka lehkhazir theihna'na tanpuina a dil fo te kha", tiin engkim mai chuan tunhma nun an hriatchhuah tir thu a sawi a ni.
# Sawisel i duhloh chuan engmah ti lo la, engmah i ni lo mai ang.
# Midangin an complain apiangin hun tha a awm thin.
# Hlawhtlinna hi in pek chi a ni lo, thawhchhuah chi a ni.
# Min puih duhlotu te avangin ka lawm thin. Keimahin hna ka thawh theih phah a. Keimah chauh pawhin ka huausen zia min hriatchhuah tir fo thin.
Comments