SIPAI PAKHAT LEH PLAYING CARD

SIPAI PAKHAT LEH 

PLAYING CARD

Vawikhat chu Africa hmar lamah sipai rual khat, tlangval rual khat hi buaina tireh turin an zin a. Pathianni vawikhat chu khaw lian vak loah Surgeant hovin Biak Inah an inkhawm ve a.

Chaplain kaihhruainain Ṭawngṭai dan tur an zirho va.  Ṭawngṭai zirna lehkhabute nei chuan an phawrh sap sap a. Mahse, sipai zinga rawlthar pakhat chuan Lehkhaden (Playing Cards) a phawrh a, a khal a khal ta mai a.

Sergiant chuan a hmuhin a thinrim em em mai a. Inkhawm ban chuan an hotu Marshal hnenah hruaiin Biak In chhunga Lehkhaden a khawih dan vel chu report ta a. 

Marshal pawh chu a thinrim hle a. Sipai hnenah chuan, "Insawifiahna tur i neih loh chuan na takin ka hrem dawn che a ni," tiin a vau a.

Chu sipai chuan, "Ka pu, ni ruk chhung zet kein kan kal tawh a, Bible leh Ṭawngṭai dan bu ka keng lo va. Mahse, ka thil ken hlutzia i hriat chuan mak i ti ngawt ang," tiin Lehkhaden chungchang chu hetiang hian a sawi ta a ni. 

"Ka pu,

- Lehkhadena MAL (Ace) ka hmuh hian Pathian pakhat chauh a awm tih ka hrechhuak ṭhin a. 

- ZATHNIH (2) hian Bible-a bu hnih Thuthlung Hlui leh Thuthlung Thar min hriat chhuahtir a.

- ZATTHUM (3) ka hmuh hian Pathian pakhata Minung pathum - Pa leh Fapa leh Thlarau Thianghlim ka hrechhuak ṭhin a. 

- ZATLI (4) hian Chanchin Ṭha 4 ziaktu Matthaia, Marka, Luka leh Johana min hriat chhuahtir a.

- ZATNGA (5) ka hmuh hian Nula Thianghlim fing panga khawnvar hal nachang hriate  ka hre chhuak a. 

- ZATRUK (6) hian ni ruk chhungin Pathianin Van boruak leh leilung leh a chhunga awmte a siam zo tih min hriatchhuah tir a.

- ZATSARIH (7) ka hmuh  hian Pathianin ni ruk chhunga a thil siamte zovin Nisarihnaah a chawl a, a serh tih ka hrechhuak a.

- ZARIAT (8) hian tuilet laia dam chhuak, Nova te chhungkua mi pariat te min hriat chhuahtir a. 

- ZATKUA (9) ka hmuh hian Isuan phar sawm tihdam, pakhat chauhin lawmthu a sawi a, pakuain sawi nachang an hre ve lo tih ka hrechhuk ṭhin a. 

- ZATSAWM (10) hian Pathianin Mosia hnenah Thusawm a pek kha min hriat chhuahtir a. 

- JACK ka hmuh hian Ramhuai Setana ka hrechhuak a.

- QUEEN hian Hmeichhe Thianghlim Mari min hriat chhuahtir a.

- KING ka hmuh hian Kristiante chuan Lalpa pakhat, engkimtithei kan nei tih ka hrechhuak a ni.

= Tin, Lehkhadena zat zawng zawng belhkhawm hi 365 a ni a. Chu chu kum khata Ni awm zat chiah a ni. 

- Lehkhaden hi 52 chiah a ni a. Chu chu kum khata Chawlhkar awm zat chiah a ni ve leh a. 

- Lehkhadenah hian Milem chuang 12 a awm a. Chu chu kum khata Thla awm zat chiah a ni.

- Lehkhadenah hian  Chi 4 - Tawka, Ak, Zum leh Ṭial a awm a. Chu chu Thla khata Chawlhkar awm zat chiah a ni bawk. 

Tichuan maw, Ka pu, Lehkhaden hian Bible tluk miah lo mah se ka tan chuan  Ṭawngṭaina Lehkhabu pawimawh tak asin," a ti ta a.  Hremna chu a pumpelh chiang hle a ni. 

/- bchhangte

                ::::::::::::::::::::::::::::::::