UKRAINE RAMBUAIA HRUAILUTTU

UKRAINE RAMBUAIA HRUAILUTTU VIKTOR  YANUKOVICH

(Ex President of Ukraine)

Ukraine hian Russia ațanga an in-dan hnuah president pasarih an nei tawh a, a pawimawh zual pathumte erawh kum 2010 hnulama president pathumte an ni. Tuna an president Volodymir Zelenskyy-a hi kum 2019 ațanga lal kha a ni a, ani hma kum 2014-19 chhung khan Petro Porosenko-a chu president-in, ani hma leha mi chu Viktor Yanukovich (2010-14) a ni a.

Buaina bulpui intanna chu kum 2010-14 chhunga president Viktor Yanukovich-a hi a ni. Tichuan kum 2010 February thlaa Ukraine ram inthlanpuiah Viktor Yanukovich a chu fair takin tling a. Nimahsela a president chauh tihah chuan beisei loh tak maiin a che ta a, April thlaah chuan Russia chu Kharkiv khawpuiah inremna ziahpuiin chutihlaia Russian president chu Dimitri Medvedev a ni a, prime Minister chu Vladimir Putin a ni a. Chu inremna hmang chuan Russia ațanga natural gas an leina man chu 30% a tihhniam a ni a, lehlamah Russia chu Sevastopol (Black Sea-a mi) lawngchawlhnaa an Navy hmunpui hman hawh chu kum 25 dang pawhseisak a ni ve thung a. Chu chuan Ukraine mipui tam zawk chu a ti thinur em em mai a, tling hlim chauh e ti lo chuan sawiselna nasa tak a tawk ta a.

He buaina hi Soviet Union keh darh ruala ințan nghal kha a ni pakhat a (Cold War an tih mai, US Democracy-in Russian Commu-nism a hnehnaa ngaih a nih nghe nghe kha), buaina hmasa ber chu Black Sea-a Russian Navy inchan-sem chungchang a ni. An inremna angin ram thar Ukraine chuan Russia chu lawngchawlhna chu a hman hawhtir nghal a, Yanukovich-a president hlimhlawtin kum 25 a pawtsei ta mai chuan lungawi lohna nasa tak thlenin gas man tlawm hmanga Russia inthunun-tirnaa ngaihna a lian hle a.

Yanukovich-a chuan Sevatopol lawngchawlhna hman hawh hun a pawhsei bakah kum 2010 vek October thla chuan Ukraine Constitution Article 111-na a amend a. Chumi hmang chuan amah president chu thuneihna pumhmawm theihna inpek tuma ngaih a ni a; mipuite chuan kum 2008-a chutiang chiaha Vladimir Putin-a’n a lo tih tawh avangin hlauhthawnna nasa tak an nei a (Prussia hunlai pawh khan Bismarck-a khan hetiang deuh hian a lo ti tawh a). Chutiang taka mipui rinhlelhna a khum mek lai chuan kum 2012 chho khan ei rukna hrang hrangah a hmingchhe zui a, a bikin a chhungkhat hnai tam tak chuan an hausakpuiin mipui lakah chuan a tlahniam ta hle a. Ama ho hian $ Billion 37 lai an eiru niin an chhut bawk. Opposition hruaitu lawk Yulia Tymoshenko chu abuse of power tihchhuanlamah jail ah a khung leh ang lawi a. 

A hma a lo in tiam tawh European Union Association Agreement chu Mipui rilru thawi dam nan tiin Yanukovich-a chuan kum 2013 khan European Union chu agreement ziahpui a tum ta a. Chu inremna chuan Ukraine ram leh mipuite tana hamțhatna tam tak a ken tel avang leh Soviet ze hlui hnuchhawn zawnga hmalakna a nih vangin lawm a hlawh hman hle a, nimahsela November thla, a hmalaknain a vawrtawp a thleng țan tihah chuan a thutiam chu a sut leh ta thut mai a, Russia in $ 3 billion loan hmanga an lo thlemna chu a pawm ta daih zawk a. Vladimir Putin  khan ukraine chu khawthlang ram nen an inhnimhnaih a duh loh vang a ni pakhat a. 

Lungawi lohna nasa takin a zui a, a tira awka chhuaha mipui nuar chu Berkut State Police ten silai nen an chhanlet hnu chuan tharum thawh zawnga kalin Europe ramte zawm duhna Euromaiden Movement an tih mai a chhuak zui ta a. Kum 2014 chho chuan an buai hle tawh a, khawpui hrang hrang, a bikin Kiev-ah phei chuan kawngzawhin hmun tam takah mipui leh police an inbei a. Sawrkar erawh a diau duh chuang lo a, kum 2014 January thla chuan nawrh khapna Anti-protest Law a siam leh ta sauh sauh a. Chu chuan mipui thin chu a tirim zual sauh a, khawpui hrang hranga sawrkar building-te chu an luah luihsak ta a.

Ram pum buaiin an buai zui a, chu chuan ramri lehlam lehlam pawh a nghawng chawpchilh nghal a. A manganthlak tak em avangin February thla chuan Agreement on Settlement of Political Crisis in Ukraine tih inremna ziah a ni a, lehlamah European Union aiawhte telin lehlamah Russian aiawhte an awm ve bawk a. Nimahsela inremna ziah a nih hnu lawk chuan Yanukovich-a leh a Cabinet-a mi pawimawh țhenkhat chu an relh bo ta a, Ukraine Parliament pawh chuan a ban zui ta nghal a ni. 

Yanukovich-a leh hote chu Russia-ah an chho zui ta bawk a (Putin-a puihna nia sawi a ni). Ukraine-ah chuan movement chhuah țan laia opposition hruaitu, billionaire Petro Porosenko-a kaihhruai sawrkar lailawk a piang a, mipui thlawp a hlawhin president atan pawh a langsar nghal hle a. 

Ukraine-ah chuan movement chhuah țan laia opposition hruaitu, billionaire Petro Porosenko-a kaihhruai sawrkar lailawk a piang a, mipui thlawp a hlawhin president atan pawh a langsar nghal hle a.

Pawi ta erawh Euromaiden Movement chhuah țan tirh lai khan Russia sipaite chuan Supreme Council (an Parliament ve) luhchilhin Crimea chu a lo la ve chiah thung a, president atan an lamțang Sergei Aksyonov-a an dah a. Vantlang poll an buatsaih nghal a; thil chiang sa, Crimea leh khawchhak lam chuan Russia zawm thlangin kum 2014 March ni 16 chu Crimean Independence Day-a puang a ni ta bawk a. Chutia ram chhunga an rik luih luih laia an rambunga an lo ngaih reng chhuhsak an ni chuan Ukraine thin chu a tirim em em mai a, Russia erawhin poll-ah pawh min zawm an thlang alawm a tihsan a. Chutiang chuan Pu Modi-a lal kum khan Ukraine history-ah chuan thil pawimawh tak tak a thleng a; Euromaiden Movement, President thar neih leh Crimea channain a tlakbuak ta a. Crimea leh khawchhak lama Russian awmte thlavang hauh a țulzia a sawi chuan Russia awntute chu a cho phur sauh a. Donbas biala helte chu an ngampa tial tial a, “Kan pui lo” ti chung zelin ralthuam leh sipai chaknain a pui ta mial mial mai a ni.