TUNLAI KHAWVEL LEH UNO
TUNLAI KHAWVEL LEH UNO (chhiar peih tan chauh)
TKa Zote Thankhuma
UNO lo dinchhuah dan leh a chhan sawi dawn chuan League of Nation chanchin tlem han tarlang hmasa ta ila,
INDOPUI I NA
1910 chho velah khan German ram chuan sumdawna lamah hma alo sawn ta em em mai a, an lal, Kaisar Welhlem chuan zau leh zuala in chhehdarh alo duh ta a ni.
Heng hunlai hian British chuan khawvel hmun hrang hrang ah ram awp luih (colony) a nei ferfur mai a. Chumai bakah an lawngrual ropui tak mai chuan khawvel tuifinriat zawng zawng hi an awp emaw tih mai tur hian an thunun bak si. Heng hi German lal Kaisar Wilhelm ll chuan a itsik ru em em mai a ni. Berlin, a tanga Balkan leh Turkey paltlangin, Istanbul, Bagdhad thleng a Rel kawng sial tlang ruah mai chu alo duh ta a, hetiang ti tur chuan British thuhnuaia awm ram tamtak paltlang a ngai a, Indo chawhchhuah a, British chu hneh ngei ngei alo tum ta a ni. Heng hunlai hian Europe ramah indo chhuak chiah silo hian boruak a in mung nasa em em a.
1914 june28 khan Austria Lal fapa, Archduke Franz Ferdinand leh anupui Duchess of Hohenburg te chu Sarajevo ah an zin a, Chutah chuan Tlangval pakhat, Gaverilo an alo kap hlum ta mai a. July 23 ah Austria chuan Serbia nen an in laichinna a chhuchat ta a, july 28 ah indo a puang zui nghal. Hei hi indopui pakhatna kan tih fo lo chhuah na bul chu a ni. Europe ram te chuan indo an puahchah ta sung sung mai a, German Lal Kaisara chuan 1914 july ni 3 ah Russia do a puang a, Russia pawh in sipai ala thar nghal chur chur a, August ni 4 ah German in Belgium a run nghal a, British in August ni 4 vek hian German do a puang ve nghal a, Indo an puang ta sup sup mai a, Kaisar Wilhelm duhthusam ang ngei in Indopui a chhuak ta.
German, Hungary, Bulgaria, leh Turkey te an tang tlang a, "Central Powers tih an ni" leh lamah British Belgium, Russia, France, Italy, Serbia leh America te an tangrual ve thung a. "Allied "tih an ni thung. Indona chuan Europe ram pumpui chu a kangkai ta hum hum mai a, a nasa in a rapthlak ngei mai, kum 4 a han liam a, 1918 alo herchhuak ta.
Ralkap mi sipai mtd 8 zet leh civil mi mtd tamtak an thi a, Europe khawmual pui map pawh a danglam vek hnu, November ni 11, 1918 ah German lam chu an tlawm ta a ni.
1919 June 28 ah he indo chungchang ngaihtuahna, "Versailles treaty" an tih chu France ramah neih a ni ta a, German Lal Kaisara chu a ram Germany atangin an hnawtchhuak ta mai a. Chu mai bakah, German Sorkar chuan indo vanga ln leh lo chhia leh Sum leh pai sen ral zawng zawng siamtha a, rul leh vek turin thutlukna an siam bawk a. Sipai pawh 100,000 aia tam an nei tur a ni lo, tih leh League Of Nation din dan tur te pawh an sawi ri awm e.
Varseilles treaty an tih hi German tan chauh nilo; khawvel tan a pawi em em ringawt mai a ni, a chhan chu hei hian Indopui ll na a rawn hring chhuak ta chiah a ni.
German chuan an retheih phah em em mai a, mipui an thinrim a. Hetih hunlai a German ram retheih zia chu sawi thiam chi pawh a ni lo. An ram tlukchhiat nasat zia kan hriat thiam theih nan, 1923 khan chhangthawp grame 700 vel a rit hi an ram pawisa Mark 3,000,000,000 (tld thum) man a ni a, Beer nokhat pawh tld 4 a lei a ngai. Mark Trillion khat 1000,000,000,000, (tld 1000) leh US $ dollar khat a in tluk tawk a ni. German pawisa chuan hnahthel pawh a tluk phak lo. Kawng engkimah Europe ram ten an ensan avangin an rethei em em ringawt mai a ni.
LEAGUE OF NATION leh Hitlera
A hmasa in tunlai thil thleng nen a inan em a vangin Hitlera'n Indo a phiarruk dan han sawi hmasa leh ila.
1920 khan khawvel sorkar lian te chuan indopui chhuak leh tur ven nan leh khawvel huap buaina hrang hrang chinfelna anih beisei in League Of Nation hi an din ta a. Headquarters chu Geneva ah an nghat a, tawng hman bik atan French leh English ni se tih a ni bawk a.
Secretary-General hmasa ber Sir Eric Drummond hian 1920–1933 chhung a chelh a, Joseph Avenol 1933–1940; Seán Lester 1940 –1946 te an ni.
League Of Nation chu an thingtlukar nun chhoh ve zel a, 1933 alo herchhuak ta. Varseilles treary haw ngawih ngawihtu leh indopui l-na a, an tlawm vanga thinrim taka lo insehruh thin leh mi rorum hlauh neilo, Adolf Hitlera chuan thuneihna a rawn chang ta ngei mai a, mahni tana sum it na tel miah lovin ro a han rel ta a, hma pawh an sawn chak kher mai. Ralthuam chi hrang hranga in tih hauhsak a, Indo chawhchhuah leh ngei chu a tum ber a ni. 1934 ah chuan, sipai ni chiahlo Volunteers. (Para military. SA = Strum Apteilung = thlipui sipai) a tih mai chu 2,000,000, zet a nei der tawh. Heng te hi a hunlai chuan regular Army an tih ang chi hi ni chiahlo mah se, ralkap thei tur a trained vek an ni. 1938 ah Sipai pangngai Division 36= 600,000 a nei tawh a, 1939 poland an run dawn chiah khan sipai division 98= 1,500,000 an tling chho hman a; a hunlai a Tanks hlauh awm ber chi Panzar Tanks, division 9 = 3300 zet a nei tawh bawk. Thlawhna hi 1939 - 1945 thleng khan sipai thlawhna chi hrang hrang 119,871 an siamchhuak hman tih hria ila, hemi chhung hian thlawhna sipai pawh 3,400,000 lai an tling a ni. Heng bakah indo lawng a hunlai a khawvela tha ber ber chi a ngah lutuk ringawt tawh. Hitlera ruahman dan phei chuan 1933-1944 thleng hian Indolawng lian (battleship) 10 Aircraft Carrier 4, Battle Cruiser 12, Heavy cruiser 5 , Light cruiser 44, Destroyer158, Submarine 249 leh lawng tenau deuh tam tak tuk tur in a ruahman a, mahse khing khi an tuk ta vek lo. Aircraft carrier phei chu 1 (Graf Zepelline) chauh hi an tuk ta awm e. Tuihnuailawng erawh Atlantic tupui veng tur ngawt pawh 700 a tir liam tih hre leh ta ila, Prince Eugen, Schanhorst, Bismarck, Tirpitz, Admiral Graf Spee leh Gneisnau te hi an Indo lawng lian zual te an ni. Heng German Indo lawng te hi an tha chungchuang em em mai a, an laipui kah a dik in, an kap thiam em em mai a, mal leh mal ah chuan British leh America lawng ho khan an ngam lo hle a ni. Hetiang hian Hitlera chuan Indo alo puahchah chho ta a mipui tih phur nan Sipai rual tamtak lam pui te an buatsaih mup mup a, ralthuam show leh sipai khawmpui (rally) ropui tak tak nei in, German nula tlangval te chu a fuih thatho nasa em em a, German sipai rual pawh Sakawr piantha an sawi ang mai in an tha a za zek zek ta mai a ni. Thalai hna neilo zawng zawng hna pek alo tiam tawh chu a tihlawhtling chiang hle mai. Intin in Car neih vek alo tiam tawh pawh chu thleng dik tan ta hian an hria a. German mipui chawhphur chiama indo chawh chhuaha hnehtu niha Versailles treaty a an hming ziakna lehkha te chu pawh thler vek mai chu a tum hliah hliah mai a ni. Thilmak ang reng tak mai chu, Hitlera'n thuneihna a rawn chan hnu khan, machine pistol an tih mai, Indopui ll hun lai a, German sipai ho Machine gun lar tak Mp 42 an tih ho kha mark 80 man lek a ni leh tawh a. German ram tluchhe vek tawh chu a tungding hneh kher mai. Hetia German lo dinchhuah leh dan hian Hitlara ropui zia a pho lang chhiang ngawt mai, nunrawnna tel lovin.
1939 September ni1 ah chuan Poland a run ta a, a awp nghal hmiah mai a, chutiang chuan France te leh Europe ram tamzawk chu ala hmiah hmiah a. Sawitak ang in, 1939 tawp lam ah chuan sipai pawh 1,500,000 zet an tling tawh. Kum 1942 ah Europe ram tamzawk an la fai vek tawh. LEAGUE OF NATION in awmzia a nei ta lo, US president Rooosvelt an Europe ram hrang hrang run hauhlo tura a vauna te chu German parliament ah a chhiar chhuaka kut bengin an nuihpui hluah mai a ni.
Mahse heti khawpa sorkar lian leh hruaitu ropui nei mah se, Indo reng mai chu an lo tlin bik hauhlo mai; British a tuk tlawm thei ta derlo. Indo bei zel tur chuan, Oil leh eitur an tlachham dawn, chumi chinfel nan chuan Russia Buh hmun, abik takin Ukraine ram, Caucasus oil hmunpui an luah a tul a ni. Mahse Russia nen hian Poland an run hma lawk 1939 August 23 khan inremna an lo ziak tawh a, chuti chung chuan Russia laka indo puan alo ngai ta a ni. Tichuan Europe ram ah indona chu a alh chhuak ta hluah hluah mai a, Japan leh America a kangkai a, khawvel huap indona rapthlak tak mai chu alo chhuak ta a ni.
Operation Barbarossa
Hitlera chuan Europe ram zawng zawng deuh thaw a awp ta a, ala duhtawk lo. Kum 1941, June 22 ah chuan a sipai rual 1,500,000 leh sipai chakkhai ration vel buaipui tu ngawt pawh nuaih tam tak-Tanks, thlawhna, Laipui tam tak nen Russia chu an nawr chho ta hum hum mai a, Russia lam pawh sipai 2,000,000 rual in anlo dang na a, an hnehlo ngei mai, an tawlh hun hun mai a ni. Heng hunlai hian Russia ramah mihring 109,000,000 chauh an la awm a, Josef Stalina chuan thupek khauh tak mai a chhuah ta a. Russia ram chhunga cheng tupawh thalai a hmei apa in silai keng thei tawh phawt chuan Red Army an zawm vek tur a ni. Sipai awmloh na chhungkua chuan Ration an dawng theilo vang tiin, (comunist ramah chuan engkim rationing vek a ni si a) thilsiamna Hmun a thawk tamtak chu sipai ah an tang sung sung a, industry ah chuan upa lam ten hna an thawk ta, Russia hian indopui l na vuakvet atang in Tanks hi an siam chhuak tam hle na a, service lai chu 29000 vel an nei. 1941 September thla ah chuan Russia buhzem pawimawh ber mai KIEV khawpui chu German sipai ten an luah ta. Russia sipai 665,000 pawh German saltang anlo ni ta; General ngat pawh 60 chuang an man tel a ni. Hmun dangah lah Red Army a singtel lek lek in German sipai kut ah an Inpe puk puk mai si. Heng hi Hitlera'n alo hriat chuan a phur em em mai a. "Khawchhak lam kan hmelma Russia chu kan Ching chau te der mai, an tho chhuak leh tawh dawnlo" tiin Radio ah te a puang dum dum mai a, Russia chuan Moscow khawpui pawh hloh ngei dawn hian an inhria a, Sorkar ministry pawh an sawnchhuak ta rum rum mai.
Mahse September thla alo ral meuh chuan German sipai 80000 an thi a, Russia pawh in sipai 2,500,000, Laipui 22000, Tanks 18,000, thlawhna 14,000 a chan tawh. June ni 22 indo an han tan khan nikhat thil thu lek ah German in Russia thlawhna 3000 ngawt a kahthlaksak nia mawle. Mahse Russia thasik khawvawt rapthlak chuan a rawn nangching ta a, hetah tak hian "Rorum" ringawt nilo thluak fim a pawimawhzia a hriat hle mai. Hitlera chuan a sipai rual khawvawt in a hmeh khawng che thei tawhlo te chu tawlhkir a remti reng renglo, chuti chung chuan an tawlh kir lo thei ta chuang silo. Hitlera chuan kumthar lam ah Russia ram beihpui thlak leh chu a tum ruh hle mai a. Russia pawhin sipai leh ralthuam an neih zawng zawng deuh thaw an hloh tawh. Ramdang tanpuina tello chuan Hitlera sipai rual lo thawk leh tur chu lo dan chi a ni tawh lo hial ang. Hetiang hi Russia dinhmun chu a ni ta. German ral lo lian leh ta se tan lakna hman an nei tawh lo. A bik takin chaw an mamawh takzet. Ramdang puihna tello chuan a tlu chhe ngei dawn a ni.
Heng hun lai hian America hi indona ah ala zuanglut lo na a, vanneihthlak deuh mai in President Roosevelt-a chuan ramdang hnenah Ralthuam hawhtir phalna dan, (Lend lease Bill) an tih chu a duang chhuak hlauh mai a. Hemi dan hmang hian British hnen ah Ralthuam tamtak an hman tir ta a, Russia ram pawh communist thuthlung vuan nimah se, German do kawng ah British nen ral thuhmun do an ni tlat. America chuan heng hi Russia tanpui nan a han pe ta phawt mai a.
Thlawhna 13000, Tanks 1373. Heng zinga 1442 hi chu Lawnga an phurh laiin German Tuihnuailawng in an kahpil sak a, 12571 lai in Russia ram a thleng a ni. Heng bakah British pawh in 5042 lai pe in 4203 in Russia ram a thleng, Canada hian 2736 zet a pe ve bawk a.
Sawifo tawh angin, 1941 December ni 7 ah chuan Japan Lawngrual leh thlawhna sipai te chuan America Lawngrual chu tuk khat thilthu lek ah an nuai chhe ta burh mai a, America pawh Indona ah a zuanglut lothei ta lo. President Roosvelt chuan Amerika sipai rual te chu khawvel hmun hrang hranga an ram awp te venghim turin a tir chhuak ve ta sung sung mai a, khawl lam siamna hmun tamtak chu ralthuam chher nan an let nghal zung zung bawk a. 1941 December atanga kum 4 a liam meuh chuan America chuan, Thlawhna 300,000; Tanks 87000; Indo Nana hmanchi Motor lian 2,500,000; Silai chi hrang hrang 17,000,000; Laipui 61000; Bomb leh Laipui mu tones mtd tamtak an siam hman a. Indo lawng leh an chiseh phur Lawng chi hrang hrang 5700 lai an tukzo hman. Lawng pakhat tuk ringawt pawh a hautak tehreng nen.
Khing motor leh thildang zozai khi American sipai ten an hmang seng em ni i ti a ni mai thei. Russia hnen ah Motor chi hrang hrang, sipai officer hman chi Jeep ngat pawh 77,972; Sipai thiar velna One tone Truck 351,650; Laipui 15,631; Sub machine gun 131,633 leh eitur Wheat ton mtd tamtak te chu Russia in hnehna an chan theih nan tiin phal takin a thawnlut leh ta a ni.
German chuan Russia ram chu lak faivek tumin a han bei leh ta ngei a, tluk zawng an tluchhe teuh thin ngei mai. Mahse America bawk in eitur leh Ralthuam lamah a pui nasa em em a. Hitler-a duhthusam ang ngawtin Stalingrad leh Moscow mipui te chu riltam in a hreng hlum thei ta lo a ni.
He indona ah hian Russia sipai tlangval thalai ngat pawh Mizoram mihring let 10 zet an thi a, civil mi pawh mtd 12 zet thiin, Russian Juda mtd 1 an thi bawk a ni. Russian sipai thi tamtak hi German in sal a an man riltam a an hren hlum te an ni a, a hnu lama mi nunrawng Josef Stalin-an ama sipai leh mipui a thah zui leh tak te nen phei chuan Russian mi thi zat hi hriat chian theih pawh a ni meuhlo. German sipai hi Russia front ah ngawt hian mtd 2 zet thi in an sawi bawk. WW-ll ah hian America sipai 300,000 zet an thi bawk a ni. Khawvel huap in mihring mtd 60 zet an thi a, ziaktu thenkhat chuan mtd 70 lai thi in an sawi. A bik takin Russia German war hi a rapthlak em em mai a, a chhan chu he mi ruala Russia rama tam nasa tak a tlak zui tak vang hi a ni. Stalina thupek angin German sipai an lo lan tawh phawt chuan Khua, Buhhmun, German sipai ten an rawn chhawrbawk theih tur thil reng reng chu hal fai vek tur; mahni ln ngei pawh hal vek tur tih a ni bur mai si a, mipui eitur tamtak an hal chhia a, ṭampui mithi an hma-chhawn zui nghal a ni mai a, Amerika hian tanpui ta lo se Russia ram history hi a danglam daih lovang tih a sawi theihloh.
A tawi zawngin sawi ta ila - Indopui ll na kha khawvel sorkar lian pahnih ten lamtang neia an indona a ni.
America leh a lamtang te kha "allied force" tih an ni a, chuta mi pawimawh te chu -
- Soviet Union -Joseph Stalin
- United States - Franklin D. Roosevelt
- United Kingdom - Winston Churchill
- Republic of China (1912–1949) Chiang Kai-shek te an ni a.
German leh a lam tang te kha, "Axis Powers" tih an ni bawk a, chuta mi pawimawh te chu -
- Nazi Germany - Adolf Hitler
- Empire of Japan, Hirohito
- Fascist Italy (1922–1943) Benito Mussolini te an ni.
1945 may thla ah chuan Hitler'n "Engtikah mah kan tlawm ngai lovang" alo tih na hmun, German ram Berlin khawpui ah Russian Red Army an lut ta a, German ram chu alo tlawm ta a ni.
1945 August ni 6 (Hiroshima) leh ni 9 (Nagasaki) ah te America in atom bomb a thlak a, August ni 15 ah Emperor Hirohito chuan tlawm thu a puang ve leh ta a, Khawvel indopui chu alo tawp ta phawt mai a. LEAGUE OF NATION chu German leh Japan avangin awmze neilo alo ni ta a, tihtawp zui a ni ta bawk.
UNITED NATION ORGANIZATION (UNO)
Khawvel sorkar lian hruaitu te chuan indopui lo chhuak leh thin chu an ngaimawh em em a, khawvel sorkar hrang hrang te buaina leh harsatna chingfel thei tur pawl, League Of Nation aia changtlung zawk din tha in an hria a. 25 April 1945, ah ram hrang hrang 50 hruaitu te chu, America ram California State, San Francisco ah inhmukhawm in UNO din dan tur leh in kaihhruai dan tur te an duang ta a. UNO thuthlung hi 26 June 1945 ah sorkar hrang hrang 52 ten an ziak ta a, 24 October 1945 atangin UNO dan leh thupek te chu kenkawh tan alo ni ta a ni. Tun dinhmunah UNO tawng hman tur (Official languages) a tan Arabic, Chinese, English, French, Russian leh Spanish te pawm a ni mek a, Membership hi sorkar hrang hrang mahni a ro inrel ram 193 an awm mek a, observer states an tih hi pahnih, Vatican leh Palestine an awm bawk. Heng state te hian UNO rorel khawmpui te chu an chhim ve thei a ni.
Tunah hian Secretary‑General António Guterres, Deputy Secretary - General Amina J. Mohammed ten an chelh mek a ni.
Headquarters hi, 760 United Nations Plaza, Manhattan, New York City ah building ropui tak nei in mi sang tamtak in hna an thawk mek a, UNO secretariat building awmna hi Hacter 18 vela zau a ni a, mak ve deuh mai chu hemi huam chhung ah hian America emaw New York state emaw in thuneihna pakhat mah an neilo; "International Territory" an tih ang hi a ni.
Sawi tak angin 1945 ah indopui chu a tawp leh ta a, League Of Nation inkaihhruaina dan ai a famkim leh Khawvel sorkar hrang hrang te inkar buaina chingfel thei ngei ngei turin UNO chu din alo ni leh ta a. He pawl ropui tak hnuaiah hian pawl tenau zawk tamtak an awm leh a, WHO, Unicef, Unesco tih te a tam lutuk, khawvel mipui tan an tangkai em em mai a ni
Thil hriatthiam harsa angreng deuh deuh mai chu - Remna leh Muanna chungchanga dan lekkawh tu ber Security Council (UNSC) an tih ah hian member 15 an awm a, members tur te hi kum hnih dan zelah General Assembly in a thlang thin a, hriat thiam har ang reng deuh mai chu, heng member zinga panga te hi thlan ngai lo, member nghet an ni bik tlat mai hi a ni. Chu mai bakah member nghet te hian Security Council thutlukna paih theihna "VETO power" an tih chu an la nei leh ta bik zel a, United Kingdom, USA, France, China, leh Russia te hi member nghet te an ni. Hei hian UNO member ram te intluktlanna sadai chu a thiat chiang hle.
Tehkhin nan, China in Taiwan chu tharum hmanga hneh lak a han tum a, UNO chu khawvel mihring tung chho a kal tawh phawt ten, mahni duhthlanna leh zalenna sang ber an neih theuh theih nana din anih angin, "China in Taiwan hnehlak a tum dan hi UNO danpui kalh a ni e" ti ang zawng in Security Council chuan thutlukna an han siam dawn a, China chuan Veto power hmangin a dangthla hmiah thei a ni. Burma ramah sipai nunrawng pui puiin sorkarna la in mipui tam tak an kaphlum a, Burma Sipai sorkar thil tihdan hi UNO danpui kalh a ni e, tiin resolution han pass dawn ta se, Burma sipai sorkar thlawp tlattu, Russia chuan Veto power hmangin a dangthla leh hmiah dawn a ni. Lehlamah Burma ram chhunga civil war thleng mek leh mipui retheihna leh tawrhna zozai chhanchhuah khi UNO din chhan chu a ni leh bawk si, chuti anih si chuan, Burma ram chhunga thil thleng mek, rapthlak tak taka mipui an kahhlum buaih buaihna leh, In leh Lo khaw pumpui an halral puk pukna te khi Russia chuan a pawmpui thlap tihna tluk a ni leh ta a ni. Leh lamah UNO security council a Veto power hmanga chhantu nei ve lo Ram thenkhat ah buaina a chhuah in Member ram te thawhkhawm sipai te chu "UN Peace Keeping Force" tiin an tirlut leh tho si, member nghet ram te avang hian UNO hi a fair lo mang e pawh a tih theih hial mai.
RETURN TO 1939
1939 September ni 1 ah German sipai rual te chuan Poland an run a, heta Hitlera chhuanlam hi a dawrawm hle. Danzig khawpui leh a chhehvel te hi German tawng hmang tamna bial a ni a, heng kan mi leh sa te hian tihduhdah an tuar nasa lutuk a, chhanchhuah an tul tih te, Purassia nen a inkalpawh nan coridoor zau tawk tak pek te a phut a, Hitlera tum ber erawh chu Sipai chakna hmanga Europe pumpui lak fai vek a, German kum sang lal ram din a ni.
Hetiang chiah hian tunah Russia chuan Ukraine ram bung thenkhat chu Russian an tam zawk tih chhuanlam in a run leh mek a, UN security council ah an han ngaihtuah ta ngei a, Russia chuan Veto power hmangin a block leh ta hmiah mai a. UN hotu lian ten ni thei ngang in an hrelo a niang, emergency Assembly meuh ko in an han ngaihtuah tha leh ta a, Assembly chuan Russia chu thiamloh a han chantir ta ngei a, Russia lam chuan UNO General Assembly meuh pawh an pawisa ta chuanglo, chuti a hneh in Nuclear Bomb hmanga beih zui ah Ukraine ram hi ala vau zui kuk kuk mai a ni. Tih tak takah chuan Russia tan hian a zahthlak em em nachhan chu, Russia leh Ukraine te chu han khaikhin ta ila, Nausen kum 3 mi leh tlangval kum 22 mi sek phiar fut mai hi insual ta se la, tlangval kum 22 mi chuan hneh thei si lo se, a zak thinrim chuan silai chuh ut ut ta se, chutiang deuh chu an ni. Hitlera leh Valadimir Putina inan lohna ber chu Russia thalai ten Indo an phur velo. Hetiang anih tlat avang hian Russia sipai te hian hnehna famkim an nei thei ngailo vang.
Engpawh nise, UN General Assembly meuhvin Russia chu thiamloh chantir mah se, UNO hian Sipai a tirlut ngam dawn lo va, hei tak hi UNO member theuh theuh ah lentlak a rualloh zia lantirtu chu a ni. Burma ram buaina ah hian UN Assembly meuh inrawlh ngat sela peace keeping force a tirlut ngei dawn si a, hetiang hian ram tamtakah an lo inrawlh tawh thin a ni.
CHINA PAWH
1939 ah bawk kir leh ila, khatih lai khan Japan ramah pawh a rukin nula tlangval mtd tamtak chuan Japanese empire Army an zawm chur chur tawh a, an tum ber chu Asia leh Pacific tuipui a British leh America ram awp zawng zawng lak fai vek a, awp beh hmiah a ni. 1941 December ni 7 ah America lawngrual Paciffic tuipui veng tu ber te chu Pearl Hurbour an awm khawm laiin an chhu che vek, mahse kum 4 a han liam meuh chuan America chu do mai mai chi an nihloh zia an hrechiang tawh kher mai.
Hetiang chiah hian China ram rawn hausa thar thut chuan south east Asia ram thenkhat leh Taiwan mai bakah South China Sea zawng zawng mai chu, "kan ta a ni e" tiin tharum hmanga neih an tum mek a, Russia leh China te hi khawvel ram tamzawk ten an thlawp lo, mahse China hi 1939 kum vela Japan ho ang tho khan an luhlul kher mai. Indo hlawk lohzia hretu, indopui-I na leh 2 na hunlai a mi anlo boral zo tawh a, 1945 hnu lama piang ten khawvel an kaihruai ta a, indo hlawk lohzia an theihnghilh ta a ni ber mai.
UNO meuh pawh in, League Of Nation ang mai khan AWMZIA AN NEI TA LO anih ber hi maw.
Source : FB
Comments