ZIRNA

 ZIRNA

~H.C. Vanlalruata

He article ṭha tak mai hi WA ah ka chhar hlawl mai a. A ziaktu pawh dil lem lovin helai ah hian ka khung tawp mai a, pawi a ti em lovang chu maw!?

Mingo hovin an ralthuam chungnung zawk leh zirna leh thiamna-a an chungnun zawkna hmachhuana Mizote tharum hmanga min hneh hnu khan tunlai zirna (modern education) hi kan hmelhriat ve chauh kha a ni a. Khami hma khan Mizote hian engmah an zir ngai lo a ni lo. An dam khawchhuahna atan thil tam tak an zir a, thiamna leh hriatna tam tak an chhar a. Thlawhhma lak leh ramchhuah bakah ranvulh leh la deh thlengin an thiam a. An inthuamna tur an intodelh a, an vitamin, protein leh carbohydrates mamawh phuhru turin ramsa kapin an ranvulh sa an ei a, buh leh bal bakah thlai eitur an intodelh a ni.

Mizote kha sapho lo luh hma chuan an vaiin tlangram lo neiha eizawng (agrarian society) an ni a. Lehkha chhiar thiam chu sawi loh, hawrawp pawh an la nei lo chung khan an damkhawchhuahna atan chuan an zir a, an thiam bawk. Kum bula kawlkil an enin ruahtui tam kum nge tlem kum an hre thei a, thla a detin ruah tam leh tlem thla tur an hre thei. Calendar leh sana nei hauh lovin lo vah hun, buh tuh hun leh thlai chi thlak hun an hria a, a seng hun pawh an hai lo.

Planetarium a awm tih pawh hre lo leh astronomy zir hauh si lo khan vana arsi chanchin an zir a, arsi chet vel dan an hre hneh hle. Thla (moon) awm danin naupian hun bakah nausen nungchang a thlak theih dan thlengin an hria a, chumi piahlamah chuan thluak lam harsatna neite a khawih danglam theih dan pawh an hre chiang hle. Ruah sur hun an hria a, thli tleh hun tur pawh a tlangpui chu an hria (thlichhia leh hunbi nei lo thlipui – cyclone tiam lovin).

Ruahthimpui sur hun leh siruk-la tleh hun phei chu khatih lai khan an chhut sual meuh lova, calendar nei lo mahse, kum khata ni rei ni ber hria pawh an awm a nih awm kha. Chumi behchhan chuan ‘Nikir Ruah’ sur hun pawh an hre hneh hle a ni. Kha bak baka zirna leh thiamna kha a awm chuang lova, ‘modern education’-ai hian a nep chuang lo. Sakei an zimin Jim Corbett-a ang thovin a hnu a rulchukin an hrethiam bawk. Calendar nei miah lo khan kum 48 dana thleng thin, ‘Mautam’ leh ‘Thingtam’ thlen hun tur an hre thei bawk tak e. Thangnang, khau leh pangang puan chhan thlengin an hria asin.

Tih tak takah chuan kum 2006-2008 inkar chhova Mautam a lo thlen khan kan mithiam (agriculture scientist) te ai chuan hetiang lam lo zirbing tawh Pu C. Rokhuma (Mission Vengthlang) kha phailam leh ramdang atanga lo fuankhawm chanchinbumite thu lakna leh Mautam chungchang an hriatna hnar a ni. Health department-in sazu puang chungchanga invenna tur TV-a an tihchhuah pawh kha a lem, sazu var a hnung hnawih dum thlalak mai mai a ni.

Heti’anga kan sawi duah chhan chu hnam kalphunga zirna leh thiamna chharchhuah (traditional knowledge) hi ngaihnep chi a ni lo mai ni lovin zirna leh thiamna huanga khung tlak a ni a. Galileo-a’n entlang a siam/hmuhchhuak a, van a thil awmte a zir tih hre lo khan an damkhawchhuahna turin Mizote khan van lam chanchin kha zirin an lo hre em em a. Hei hi zirna bulthut, mihringte tana tangkai chu a ni. Zirlaibu leh sikul awm hma leh awm hnu pawh hian zirna hi englai pawha ngaih pawimawh tur a ni.

Saphovin ‘education’ an tih mai, zirna hi a pawimawh dan sawi pawimawh thiam pawh harsa khawpa pawimawh a ni. Khawvel ram leh hnam hrang hrang chanchin hi chhui chianga kan chik phawt chuan mithiam leh thil hria, zirna kawnga hmasawnte chu an nunphung a changkang a, an hausa tlangpui bawk. Zirna lama hnufual, a hnam pum anga lehkhathiam tlem ramte hi khawvel remna tichhe theitu leh ram hlauhawm an ni zel, a bikin sakhaw ruihchilh ram, zirna lam ngaihthah site hi.

A michengte’n lehkha an thiam a, an hriatna a zau phawt chuan sorkar pawhin mipui a palzut mai mai ngam ngai lova. “Well-informed citizenry” chuan sorkar a khalh ngil ngei ngei a ni. Mi mawl leh lehkha thiam lo, lehkha chhiar zau lo awm tamna apiangah mimal lal hrawtna (dictatorship) leh mipui rahbehna a thleng a, hriatna nei tlem mipui chu duhthala awpbeh leh rahbeh an awlsam bik bawk. Lehkha thiam lo leh hriatna nei tlem, sakhaw ruihchilh site chu an sakhaw hruaitute’n (Iran ram ang khuan) an zalenna leh chanvo thlengin awlsam takin an rapbet mai a ni.

Khawtlangah pawh lehkhathiam tamna chu an kalphung a fel a, mithiam leh hre zau kaihhruaina hnuai-ah zahawm leh fel taka kalin khawtlang mipui pawhin an dikna leh chanvo a hre thei a. Dan rorelna an ngai pawimawh a. An khaw/veng chhunga hmasawnna hna thawh danah pawh mi pamhamte’n an bum thei lo nge nge a ni. Lehkhathiam kan tih hi lehkha zir sang leh certificate ni lovin chhawr tlak thiamna nei, thil chhiar tam leh hman tlak, finna tak tak neite an ni.

Tunlai khawvelah chuan tunhma Mizo nun anga khawtlangin harsate a khaichhuah ang kha a theih vek tawh lova, mahni chakai-khawrh nun a ni tawh. Chuvangin zirna kalphung tha leh tluantling hmanga kan inchher chhoh hi tihmakmawh a ni lehzual tawh. Zirlai zawng zawngin kan zirlaibu piahlama hriatna zau zawk dapa lehkha/lehkhabu kan chhiar zau leh chhiar tam a pawimawh hle bawk. Zirlaibu hi vawng hneh viau mah ila, ekzamna-a pass theihna piahlam hriatna zau tak tak nei tur chuan a tawk lo.

Kan zirlaibu/syllabus, a bikin Mizoram Board of School Education (MBSE)-in an siam hi National Council of Educational Research and Training (NCERT) tihdan ang zela an siam niin an sawi a. Chuti a nih si chuan engvangin nge Mizo zirlaite hian NCERT kaihhruaina anga kal ve tho state dang zirlaite hi UPSC leh India ram pum huap inelna-ah kan tluk loh em em bik si le? He zawhna hi kan ram hruaitute, Education department hotute leh kan mithiam ‘educationist / academician’ te hian a chhanna an hriat chuan hmasawnna atan an thawhhlawk khawp ang.

Mithiam leh zirna lama hriatna thuk nei ni vek lo mah ila, kan ram zirna kalphung siamthat kawnga mawhphurtu leh veitu zawng zawng hian bengsika kan ngaihtuah a, mutmawh hnarmawha a kan neih a tul ta khawp mai. Tunhma a “Pal an ping rul a awm,” tih zirlai hun, Liandala hla “Aia upate zah thiamin…” tih zir thinte leh a hmalam amite kha kan mithiam, All India Services (AIS) thlenga lut theite kha an ni a. Khatihlai kha chuan Mizoram kha AIS chherchhuahna hmunpui ni hial awma mawi a ni.

Hun a lokal deuh a, sap sikul kan tih mai (English medium school)-a kan rualawhna phuhru turin naupang te atanga sap tawng thiam takin kan inchherchhuak a. Tunhma-a rual-awhna kan phuhru-a kan ngaih hnu hian thiamna tak tak, chhawr tlak leh hnathawk tak tak thei, AIS pawha inziaktling thei kan van ta zawk tlat mai. Kan van satliah a ni lova, India sorkara dinhmun sang leh sorkar laipuia mualkil pha kan nei tlem ta telh telh mai hi ngaihtuah chian ngai a ni. Tam takin IAS/IFS (Forest)/IPS ngawt hi a pawimawh ber lo an ti a, pawimawh ber kher lo mahse, a pawimawh em em a, hetiang service-a lut thei lo hnam kan ni ta hi a zahthlak bawk a ni.

‘Mizo tawng thiam ngei chief secretary kan duh’ tiin iak iak mah ila, tun atanga rei vak lovah hian kan nei thei dawn tawh lo tih a chiang. Hetah hian han zeh lawk rem deuh chu – kan hnam humhalh kan duhnate hi AIS neih ngawr ngawra puitling tur chu a ni lo. Chuti chung chuan kan nunphunga huau huau, hut hut leh hlimna lam ringawt kan um avangin kan khawtlang hrim hrim hi a sawngnawi zo tawh a. Rinawmna, taimakna leh teirei peihna te hi kan tlakchham lian takte a ni. Heti hrim hrim hi chuan tho leh thei lo khawpin he hnam hi a tlusawp ngei ang.

Kan hotute’n kan zirlaite zirlaibu leh syllabus hi India ram pum huapa helam buaipuitu leh mithiam rual awmna NCERT nena inang an ti bawk si a. Chuti chunga state dang rual kan el pha lo leh zirna lama mual-eng kan hmu pha ta lo hi eng nge a chhan ni ang? Zirtirtute hian an zirtir thiam lo nge, an hna an thawk tha lova zirlaite hnenah thiamna an tuh thei ta lo em ni? A bik takin zirlai naupang, pawl hniam lam ami (elementary stage)-te hi? Kan zirna hi a bilhah a tho lo a ni thei em? Kum engemaw zat a zawna HSLC a hlawhtling pakhat pawh nei thei tawh lo sikulte hi thiaha, zirtirtute pawh ban phiar mai a hun tawh em?

Zirna bulthut, zirlai sikul lut hlim chho atang hian kan zirtirna a fuh tawh lo niin a lang a. A sang lamah an buai tulh tulh mai niin a lang bawk. Hei ber mai hi a bul atanga siamthat ngai hmasa chu a ni. Primary school-a zirtirna tha dawng lo chu middle school-ah an buai chhova, high school-ah phei chuan sikul kai an chak tawh lo. Chuvanga zirna bansan (dropout) ngah hi kan niin a lang. Hei hi siamtha turin chet lak nghal a ngai tawh a ni.

A sang lam, technical leh professional lam zirna pawh ngaihthah hauh loh chi a ni. AIS kan nei lo zel dawn a nih pawhin mihring zai leh enkawl dam thei doctor thiam chherchhuak thei turin kan inruahman a ngai a. Lei tichim mai mai lo tur leh kawngpui tha leh tlo siam thei tura contractor-te vil theitu engineer thiam kan mamawh zel dawn. Pawikhawih si lova tualthata puhte court-a thiam chantir theitu ukil thlengin kan mamawh a ni. A tawi zawngin thiamna hmanga chhawr tlak leh hnathawk thei chherchhuak tur ‘education system’ hi kan va mamawh tak em!