KUM 5 JAIL TANG TUR LEH Rs. 180 LAKHS CHAWI TURA HREM A NI

 KUM 5 JAIL TANG TUR LEH Rs. 180 LAKHS CHAWI TURA HREM A NI

Mar 20, 2023(MSR): Court of Special- Judge (Prevention of corruption Act) Dr. HTC Lalrinchhana chuan Serchhip a Excise & Narcotics office-a sum eirukna thubuaia thiamloh a chantir, Pu Rongura chu kum 5 tang tur leh cheng nuai 180 chawi turin a ti a, Pu Suakngura chu, kum 4 tang tur leh cheng nuai 3 chawi turin a ti.

Court of Special Judge (Prevention of corruption Act) Dr. HTC Lalrinchhana chuan Serchhip a Excise & Narcotics office-a sum eirukna thubuai a thiamloh a chantir mi pahnih te hremna chu vawiin khan a puang a. Cheng nuai 173, sing 4, sang 8 leh 365 eiruk thubuai-a thiam loh chantir, Excise Superintendent hlui Pu Rongura, Luangmual Aizawl chu kum 5 chhung Jail tang tur leh cheng nuai 180 chawi turin a hrem a, pawisa chawi tur hi a pe thei lo anih chuan kum Sawmkua (90) chhung lungin tang turin hremna hi a pe a ni.

Excise office sum eirukna a Pu Rongura, thurualpui tu, Serchhip Treasury Office-a Assistant Account Officer ni thin, Pu Suakngura pawh kum 4 chhung jail tang tur leh cheng nuai 3 chawi turin a hrem a, pawisa chawi tur hi a pe theilo anih chuan kum khat leh a chanve chhung lungin a tan belh dawn a ni.

Court of Special Judge (PC Act)-in, a tarlan danin sum eiruk zah hi felfai taka finfiah anih avang leh a tam tham em avangin Prevention of Corruption Act, 1988 hnuaia section 16-na in a tarlan ang tinzawn in pawisa- chawi tur tam lam hi pawisa eiruk mil hisap a, chhut a ni.

Puan tawh thin angin Serchhip Excise office-a sum hman dik lohna hi CAG report atanga hmuhchhuah a ni a, ACB in an chhui chiang a, cheng nuai 181, sing 5, sang 8 leh 871 eiruk ani tih hmuhchhuah a ni a, thiamloh chantir tak, Excise officer pension Pu Rongura hian cheng nuai 173, sing 4, sang 8 leh 365 a eiru tih finfiah a ni a, a ruala hremna tawk Pu Suakngura hian alo thurualpui a, thamna a dawng tih finfiah a ni a, sorkar sum tihchingpen thubuai-ah thiamloh chantir an ni ta a ni.