PU LALDENGA KHA..:.

 (A thih cham pualin)

R. Laldenga

Mizo Hnampa Pu Laldenga nu leh pa :

Liantlira leh Darchhungi

Hnam hming : Ralte

Pian ni : 16/6/1927

Thih ni : 7/7/1990

Nupui hming : Lalbiakdiki

A unaute :

1) Lalzawni  2) Sawngkhara

3) Lalsawia  4) Ngurchhina

5) Lianmawii

(Pu Denga hi an unauah hian a palina a ni)

Dist.Council-a Accountant hna a thawh laiin, ram leh hnam a vei em avangin a nu hnenah a hna atanga ban a dil chu a nu chuan, "Ram tan thawk la, engnge i hlawkna tur, engnge i hlawh ang?" tiin a zawt a, Pu Denga chuan, *A hlawkna chu ramin a tel ang* tiin a chhang.

Hetianga ram leh hnam vei mi, ram leh hnam tana mahni hna pawh chan ngam, mahni aia ram leh hnam ngai pawimawh zawktu Mizoin Pu Laldenga kan nei hi a lawmawm rualin, min boral san hma lutuk hi ram leh hnam tan channa nasa tak a ni.

Thi mah sela, Pu Laldenga hi Mizo future Thalai chhuan lo awm leh zel turte thinlungah erawh a nung reng thung ang.

Pu Laldenga kha mi piang danglam, mi bik, 'kum 100 lokal leh tur chhungah hian Mizo nuho hian amah ang kha an hring leh thei tawh kher lovang' tia an lo sawi  hial a ni reng a ni. A political idea leh philosophy-te hi a rilin a thuk a, zir fe tham awm. A thusawi țawngkam khat lek pawh khel deuh laih tham zela mi rilru khawih leh ril, ngaihtuahzui ngai fe zel, philosophy thuk tak nena thusawi thiam leh ngaihtuahna ril nei a ni. A thuhrimah, politics-ah chuan mahni ram leh hnam tana zalenna sualtute hi khawvelin a ngaisang a, a dah te ngai lo hrim hrim a. Hruaitu (Leader)-te ngat phei chu an chanchin hi khawvelin a zir bik a, UNO thlengin chhinchhiah an hlawh bik  a lo ni.

Remna chungchanga India sawrkar aiawhte nena an inbiak pawh khan tawh khirh chu an ti ve hle ni tur a nih kha; betu an inthlak sek a, a hniam ațanga țanin a tawpah phei chuan Pi Indira Gandhi meuhvin a biak a ngai ta hial reng a ni.

A ropuizia a taka a lo lan chhuah takna chu a han thih chiah khan a ni. Chief Minister pawh ni tawh lo, opposition MLA fang mai ni tawh khan State Funeral sunna ropui tak a hlawh pha a, a thih thuin khawvel a dengchhuak a, BBC-The World This Week-ah te khan an puang chamchi a nih kha, Central Minister-te a vuinaah rawn telin khawvel Chanchinbu lar Washington Post Correspondent te leh National Paper lian Correspondent engemawzat an rawn insir khup khup mai a nih kha. A dam loh inenkawlna, foreign-a kalna leh senso zawng zawng pawh India sawrkarin a tum a, A ruang pawh Army thlawhnain a rawn phur thleng ngat a ni. A ropui thlawt a ni. Mizote Mizo hnam kan ni tih min hriatchiantirtu, Mizo hnam thinlung chawkthoa kan ram leh hnam invenghima inhumhalh tlat kan ngai a ni  tih ngaihtuah nachang hriatnaa min tiharhthartu Pu Laldenga hi 'MIZO HNAMPA' tia koh loh phal chi a ni lo. A phu vet vet hle a ni. Chuti chu lo ni lo se chu, kan thenawm state-te tih ngaihna awm tawh lo khawpa hnamdang chimrala an awm tawh ang hian kan ram chhungah hian hnam dang nghet taka inbengbel an ther fek fuk tawh ngei ang.