Manipur Issue

Silai ruk chhuah zinga 3,422 la hmu kir lo

3rd August, 2023

Manipur-a hnam leh hnam inkara buaina a chhuah hnua tualchhung mite'n police-te ralthuam an ruksak zinga 3,422 chu tun thlengin hmuh kir an la ni lo.Buaina a chhuah hnu hian police station leh an ralthuam dahna hmun aṭangin AK-47 200 chuang, carbines 406, INSAS rifle 551, machine gune 250, leh silai mu nuai nga vel chu ruk chhuah an ni a, tun thlengin a tam zawk hmuh kir an la ni lo. Heng silai leh a mu tam ber hi Meitei hnam chenna, Imphal Valley aṭanga ruk chhuah niin, Meitei-te kutah an la awm nia rin a ni.

Police data aṭanga a lan danin, ralthuam ruk chhuah 4,500 chuang zingah hian 1,195 chauh hmuh kir a la ni.Pawi khawihna thlenga hliam tuar leh thi tam ber pawh silaia kah leh hliam an ni tih hospital data aṭangin a lang bawk. Security lam hotute chuan heng ralthuam ruk chhuahte hi hmuh kir leh vek an nih hma chuan, silai hmanga pawikhawihna thlen leh buaina hi a reh mai dawn lo niin an sawi.Ruang ngaihven loh tam zawk dan loa lutte ruang a ni - 

Manipur sorkar

3rd August, 2023

Chief justice of India D.Y. Chandrachud awmna bench chuan August 1 khan Manipur tualchhung buaina chungchang ngaihtuahin ni chanve awh hearing neih a ni. Hearing tawp lamah hian central leh state sorkar aiawha ding, Solicitor-General Tushar Mehta chuan tualchhung buaina chhuak avanga thi, ruang lam loh tam zawk chu dan loa lutte ruang an nih thu a sawi.

Manipur-ah hian Myanmar aṭanga dan loa lo lut ṭhahnem tak an awm thu leh chung mi tam zawk chu an chin hriat a nih loh thu sawi chhuah a ni bawk.

Manipur-a pawikhawihna thleng chungchang an ngaihtuahnaah Chief Justice chuan, "Pawngsual tawktute leh thahte hi kan mi leh sa an ni a, rorelna dik an hmuh ngeina tura hmalak chu kan tih tur a ni," a ti. Hei hi Mehta chuan chhangin, "Ruang lak loh tam zawk chu dan loa lo lutte ruang an ni, tum sa neia lo lutin an nunna in a tuar a ni," a ti.Hetih lai hian tribal aiawha ding, senoir ukil Colin Gonsalves chuan, "Imphal-ah tribal ruang lak loh 118 a awm," tiin a sawi. "Thla tam a liam tawh a, tun thlengin tunge an nih hriat a la ni lo a, an ṭawih mek a ni. Tute nge an nih hre turin kan va kal thei lo a, heng mite nihna hre tura hmalakna engmah a awm lo bawk," tiin a sawi thung.

Supreme Court chuan mitthite chu tunge an nih hre tura hma an lak dan theh lut turin state sorkar chu a hriattir. Manipur sorkar chu ruang la awmte chu tunge an nih zawng chhuak tur leh an chhungte hnena an ruang pe tura buaipuitu tur nodal officer ruat a nih tawh leh tawh loh a zawt bawk.

Gonsalves chuan mitthi chhungte hnenah zángnadawmna Rs. nuai 10 ṭheuh pe turin sorkar a intiam thu leh, a dawng turte'n an hman sual loh a beisei thu a sawi. 

Hei hi CJI chuan chhangin, "Zángnadawmna sem a nih dawn reng rengin, a dawngtu turte zawn chhuah phawt a ngai. Dawng thei an ni nge ni lo finfiah leh a ni ang," tiin a hrilh.

Vanglaini