SUPREME COURT IN MANIPUR BUAINA CHUNGCHANG A REL

 Litigation news >>

SUPREME COURT IN MANIPUR BUAINA CHUNGCHANG A REL

PART - 3

AUGUST 07, 2023,(MSR) :

Vawiin August 7, 2023 chawhnu dar 2:00 hnu lam khan Supreme Court chuan Manipur chhunga buaina kaihhnawih thu buai ngaihtuah tura lut - petition 10 bawr khaikhawmin,chu chu ngaihtuah a, heng thu buaite hi Supreme Court hnena thu buai chhui chianna kawnga inrawlh tura ngenna te, pawi khawihna hrang hrang vanga chhawmdawlna leh țanpuina, zangnadawmna pe tura tihna leh thu dang te an ni.

(NDTV)

Supreme Court hian Central & State Sorkar te he buaina chhuak vanga hma lakna leh rawtna a neihte a ngaithla hmasa a. Manipur DGP Ranjit Singh pawh Supreme Court zawhna chhang mai thei tur hian a awm ve bawk mahse mimal takin zawhna an zawt ta chiah lo a ni ang. 

STATE RAWTNA

State Sorkar hian SIT (Special Investigation Team) chu buaina chhuahna district apiangah din ni se tiin rawtna a thlen a.

HNIAL NGHAL A NI

Thu buai theh luttu aiawha ding Advocate lar Prashant Bhushan chuan chu thu chu rawn hnial nghalin, "kan duh chu, independent body in he thu buai an chhui hi a ni, ralthuam leh silai mu (arms and ammunitions) bo leh supply-tu chhuitu pawh an awm tur a ni," a rawn ti zawm nghal zat a. 

Advocate Nizam Pasha pawhin, hmeichhe chunga pawi khawihna FIR 16 awmte chu CBI kuta hlan vek a rawt a. State Sorkar-in thu buai chhui tura a lo din SIT hming an phuah hi kan ring ang maw? Thil sual tia puhte hi state police an ni lo em ni, tiin awki sang dam  deuh chung chuan Court chu a hrilh a. Heng SIT thlang tur hian Supreme Court chauh a ni tur a ni, thu buai ngaihtuahtu tur law officer te pawh state dang mi an ni tur a ni," tih chu Supreme Court hnenah chuan a ngen a.

Central Sorkar aiawha ding Tushar Mehta, Solicitor General chuan, "State police te chunga rinna nghah loh tawp chu a fel bik lo a ni," tih thu a rawn sawi a. A sawi zel dan chuan Supreme Court-in  ngaihdan tlang taka a lo neih leh sawi chhuah tawh dan chu a vengthawng hle tih a lang a. "Committee-ah hian Judicial officer te chauh telh ni se, civil society group lam te phei chu ruat loh ni se," Mehta SG chuan a ti. 

COMMITTEE RUAT A NI

Supreme Court chuan Manipur buaina chungchang ngaihtuahtu tur Judicial Committee High Court Judge lo ni tawh 3 awmna a ruat a. Heng ami ruatte hi hmeichhia High Court Judge pension tawh vek an ni. Chungte chu - Justice Gita Mittal, former Chief Justice, Jammu and Kashmir High Court, Justice Shalini Joshi, former Judge Bombay High Court, Justice Asha Menon, former Judge Delhi High Court te an ni. 

He Committee mawhphurhna tur chu, thil sual titute chhuichianna hna CBI-in an thawh endik a, kaihhruai te bakah heng hi an hmalakna turte a ni. 

Chhawmdawlna hna (relief), tuam damna hna, (remedial measures), zangnadawmna (compensation) pek dan chungchang, chenna in, sakhaw biakna hmun sak țhat (rebuilding houses, places of worship). 

"Kan tum chu ram dan chunga rinna an neih kir leh theih ngeina tura hma lak leh hnathawh hi a ni. Chumi atan chuan High Court Judge țang tawh țhiau 3 te awmna Committee din hi a ni. He Committee hian hnu chhui chianna hna (investigation), bakah chhawmdawlna pek dan tur te, zangnadawmna pek chungchang bakah thil țul awm apiangte a huam ang," Supreme Court CJI chuan a ti. 

SIT TEAM DIN

Supreme Court chuan he buaina chhui kawnga kaihhruaitu tur ( supervision of the investigations) Special Investigation Team a din a. SIT hotu atan hian Dattatray Padsalgikar, former Deputy National Security Adviser, ex Maharashtra DGP chu ruat a ni a, member atan pawh Police DIG rank aia hniam lo, Manipur state pawn lam mi 5/6 ruat an ni ang. 

Supreme Court hian CBI chhui chian tura pek tawhte enpui tur hian state hrang hrang police officer Deputy SP rank chin 5 a la ruat ang. 

"Hindi țawng hmanna state 5 DGP te hnenah CBI thil chhui te enfiahpuitu tur leh an hnena awm rih (deputation) tur police officer rawn tir turin rem kan lo ruat ang," Supreme Court chuan a ti. 

Supreme Court chuan thu buai/FIR CBI chhui tura pek loh State in  buaina district huama SIT a lo dinte enpui leh kaihhruaina hna chu SIT mawhphurhna a ni. zawngte chhuin a kawngah hian state pawn lam mi police Inspector an tel zel bawk tur a ni. 

Hetiang chhui chian ngai CBI kuta hlan loh State SIT din hi 42 a awm. Heng thu buai chhui hna hi a chunga sawi tak Supreme Court in SIT Member atan police  DIG rank chin, state pawn lam police te hian an kaihhruai ang. 

A BUL ȚANNA 

Supreme Court thu rel leh remruatna hi he buaina tuam dam tumnaa bul țanna chauh a la ni a, Judicial Committee leh SIT te koah chu mawhphurhna chu a innghat lian hle a. 

He buaina tuam dam tak tak erawh chu buainain a tuam mipui te kut a ni thung.

Political demand an neih chungchang hi chu Supreme Court lam rel tur ni loin Parliament-in Constitution of India behchhana a rel tur a ni. 

Naktuk August 8, 2023 ațang hian Lok Sabha ah Sorkar rin tawk lohna sawi ho a ni dawn a, Sorkar ding lai chu engti kawng maha phar tla thei khawp opposition party te MP number hian a thleng pha dawn lo tih a chiang sa a. An tum lian zawk chu thla 12 pawh tling tawh loa Lok Sabha general election lo awm tura mipuite thinlung lama Sorkar lai paihthlak hi a ni ngei ang. 

Source :

Bar and Bench 

August 07, 2023 

@ 4:07 PM IST

The Times of India 

August 07, 2023 

@ 16:17 IST 

NDTV 5:30 PM

======07082023

Huna Kawlvawm