MI HAUSA INA CHAW EI ZET CHU!!

~Mr. Fair Zela Mizo

Kan ṭhianpa Maduha  hian Mi hausa ina chaw ei a hrehawm thu vel a ziak a, ani hi chuan Kekawrte ang ang deuhin, Tlemte, a pawimawh lai fun kim siin a rawn ziak a. A thu ziah ka chhiar laia ka rilrua lo awm ve ngat ngat kha han sei deuh taka ziah kan tum ve thung dawn a ni. 

Kum 2009 khan Aizawl veng pakhata chhungkaw pakhat inah ka thleng a. An hausa si, an lirthei motor lian leh tê-ho kha, khu pawh khu, a thlang  deuh a mi pawh khu, a piah deuha mi pawh saw, saw pawh saw, heeeee laia mi pawh hi, khi pawh khi.. Tih tur hlir mai hian an in leh a velah khan  a bawk ngaw khep khup mai kha a ni a. An in len zia leh a chhung zau zia mai chu; Choka aṭang khan living room lama ṭhu te kha chu aw ki pangngai tak hian duhtawkin an rel theih ang tih tur ang vel a ni. 

An inchhung kan han lut kha, Sumo Wrestler emaw tih mai tur khawpa thau te, hei hi chu a pian hlim aṭang khan a ṭhang chho ngat ngat a nih dawn hi tih tur khawpa tlangval lian pui pui, lukawlh deuh deuh kha an lo tei suau suau  a. Nula hmel ṭha leh no em em mai, 'Ni sa do vak ta se a vuai thei mai ang em aw..' tih tur khawpa no te, hei chu theihtawp pawhin khawchhak hmaihnawih man tam ber chi nen pawh chei chiam mah se an awmpui nula a nihna an hnawih bo zo lovang tih tur chi nen, naupang leh pitar  putar nen, a thelh hian an thelh sung sung ni khan ka hre ta ber. 

Chaw chu kan han ei ta a le.. Thingpui dawra chhangban tiat lek tak tak hian Chaw thlengah chuan an rawn khawrh ta a, ka rikru te te chuan, hei chu min fiahna angrengin bar hnih velin an rawn ti hmasa a nih dâwn hi ka ti deuh. Chawhmeh lah chu, sa chi hrang hrang hi dawhkanah chuan an chhawp tlar phei dul mai a, kan han ei ta alawm; bar hnih ka bar a, ka chaw a zo vek. Ka rin aiin chaw khawrh an hre lo ta tlat. Chaw bel changtu ber mitmei kha ka chaw thleng lam en tura khalh luh tumin ring deuha ṭawng deuh vak phawt zel kha a ngai lehnghal. Ani lah chu, Chhim zawng zang dawi bawng tur an sawi ang mai hian, a thleng zawnah a kun ngar mai a. Ka beidawn tawp lamah ka chaw thleng chu hmuin min rawn khawrh nawn ve ta hlauh. Vannei ka intih hman ve tehlul nen, a hma a mi aia te hretin a rawn khawrh a nih chu!  Ka chaw chu ka'n en a, tlem hi ka ti em em a, hei hi chu fiahna a ni thei tawh lo. Min huphurh ve deuh hrim hrim a ni ang ka tirilru hman hial.

Mi dang chaw thleng chu ka'n mitmei kual vel ta a, an first installment kha an lo la chhaih lauh lauh mai chu niin! An chaw thlengah chuan Sa leh ilo vel kha an lo dah pawng thur vek bawk hi a lo ni a. Khawichhûr Mâi pâr tlan ang mai hian, an chaw thlenga chaw kha an kut zung thum hian an zu chuk zeuh a, rang deuh deuh hian an thleng chu an hai kual leh zeuh zeuh a, te reuh te tein an bar ṭhin tih ka hmu thiam ve ta. Ka sawi thiam lo, an chaw kha an zu chhaih fiam niin ka hria. Ka chaw neih chhun chu ren deuh hian a laiah ka'n nawr bung ve hmawk a, a bung pakhat zawk chu ka thleng hmalamah ka nawr chho deuh a, power back up angreng deuh turin, thla vengah ka dah a. A bung lehlam chu ren deuh hian ka chawk kual chho ve ta a.

Aw... Kan in chu ni se, nau ṭahbelh lu tiat hlirin vawi thum min khawrh nawn tawh ang maw le ti rilru chungin ka chaw neih lai chu ren thei ang berin ka'n bar ta vel a nih kha. A va han hrehawm ber mai tak. Kan chaw ei pui ṭhenkhat, duh se chuan phung pawh a vel nitin thei ang tih tur khawpa tlangval lian pui puite khan chaw chu an dil nawn miah lo. Rei deuh an ei a, chawhmeh kha an suak an suak a, khawrh nawn lohin an puar ta zel hlawm kha mak ka la ti reh thei lo.

Kei lah chu, Khawrh hnihna ka'n ei zo kha ka ril hi a rawn ṭam ta em em mai a, chaw bel bula ṭamchhawl an sawi hi chu a la ziaawm a, châw thleng dawma ril ṭam nih hi a lo hrehawm fe zawk dâwn a nih hi te ka ti ta hial. Chutiang hlir chuan kar khat kan han cham tehreng a nih chu.

An fanu college kal lai, hmeltha si, ngo si, no em em mai phei kha chuan, Chaw kha dawhkanah vawi khat mah a rawn ei lo reng reng. Kut zung hnih bawk vel emaw lek hi a thlengah a dah a, Dal a chawm a, a room lamah a chawi lut daih a, Darkar khat vel a room-ah a va tawm bo hnuin a rawn inchawi chhuak ve leh chauh ṭhin. Min han ngaizawng lo em em mai lehnghal a. Khati zat lek lek chaw ei ṭhinte chu mi te kha han ngaizawng ve se ṭha tur; ka chawm zawh ka inrin ve tehlul nen. A ti zia lo tak tak a ni. Inenlet nachangte hre ve tal se chuan a lawmawm ngawt ang. 

Ṭum khat chu, kar khat dawn lai kan cham hnu chuan, an chenna bul Huanah hian an sa repna tur thil ka siamsak a, in neitu nu leh pa ber, pitar leh putarte kha ka bulah an lokal a, kan titi laih laih a, rei deuh tak kan awmho hnuah pitar hnenah chuan, "Ka pi, chaw hi no eng zat nge in chhum ṭhin" ka ti ta tawp a, ani chuan, "Driver leh handyman te an lo haw kim lai a nih hi chuan No 5 te kan chhum" tiin min chhang. 

"Tunah hian an lo haw kim em?" tiin ka zawt ve nghal vat a, ani chuan, "Haw kim lo, Truck Driver leh handyman ho chu an kim a, Tanklorry hi pahnih kan nei a, an zin chhuah lai a nia" a ti. 

Kei chuan, "Tunah hian mi 11 kan niin ka hria a, no eng zat nge in chhum?" ka ti ve ta zel a, ani chuan, "No 4 vel a ni ang" a ti a nih chu! 

Ka thin hi a sa ta phat mai a. Kan haw ṭep tawh tho bawk a, tiin ka zak duh ta bik lo. 

"Eeeee.. He he... Ka pi.. Keimahin chaw no thum ka ei zo thei. Chaw chhun tur ka chhum hian no 2 ka ei zo ziah. In ina kan awm chhung hian rilṭam hapta kan hmang hi a ni ringawt. Chaw ei dawna titau ang char char ka ni. " ka'n ti mai chuhh! An pa kha a va melh a, Awi awi.. ka rap lutuk... Min ti. 😁