LOK SABHA MP AṬANGIN A NI TA

 LOK SABHA MP AṬANGIN MAHUA MOITRA BAN A NI TA NGE NGE

MSR : Dec 9, 2023

Trinamool Congress hruaitu, Mahua Moitra chu Ethics Committee-in, Zawhna zawt tura pawisa la leh MP te chauh hriat tur Passward pe chhuaka puh a nih hnuah Lok Sabha Member a nihna aṭangin nimin Parliament thlasik ṭhutkhawmah ban a ni ta.

.

Kum 49 mi, Moitra-i hi Parliament rorel inkhawmah Narendra Modi-a Sawrkar hnena zawhna a zawhte chu zawt turin thamna a la ṭhin niin puh a ni a. Sum a laksak zingah hian sumdawng, Darshan Hiranandani-a pawh telin Rs. Vaibelchhe 2 leh thil hlu dang a la niin an sawi.

Moitra-i hian Parliament Website-a Account bik neih chu mi a pe kual nia sawi a ni bawk a, hei hi Hiranandani-a'n amah ngeiin zawhna a zawh theih nana tih niin an sawi a.

.

Modi-a Sawrkar bei nasa tak ṭhin, Moitra-i hian thamna laa an puhna chu a pha a, Parliament Website-a in Log-in-na kimchang erawh a pe tih a pha lo.

.

A chungchang hi nasa taka sawiho a nih hnu leh Voice Vote lak a nih hnuah Speaker Om Birla chuan, "He rorelna in hian Committee thutlukna, MP Mahua Moitra-in dik lova a thil tih chu a pawm a. MP a nih zel hi a remchang tawh lo a ni," a ti.

.

Parliament-a sawiho a nih hma lawk hian Ethics Committee hian an Report hi an thehlut a, phek 500 dawna chhah niin rorelna inah hian rorel lai, BJP leh eptute an inhnial nasa hle a, Moitra-i Party pawh a ṭangna zingah an tel.

Sawiho zuina tawi tê-ah Congress leh Trinamool MP-te chuan zir chianna hun tam zawk awm te, Moitra-i ṭawngna hun pek ni se tih te an aupui a. Speaker Birla hian a phalsak lo thung. 

.

Kum 2005 pawh khan BJP MP paruk telin, MP 10 chu tuna thil ang chiah hian hnawl an lo ni tawh tih a sawi a. Hetih laia Speaker, Somnath Chatterjee chuan Report thehluh hnuah MP-te hi rorelna in chhungah an ṭawng thei tawh lo niin a sawi.

.

Moitra-i chhuina Report-ah hian 'dan lova thil tih a pawm tih chiang taka langin phat rual a ni lo' tia tar lan a nih bakah 'sumdawng hnen aṭangin Log-in (detail) a pek chhawn avangin thil pek a dawng ve thung a. MP nih loh phahna leh tih dan phung lo tak a ni' tiin ziah lan a ni bawk.

.

Hemi chungchangah hian Moitra-i hian thamna sum a la ngei nia ngaih a ni a, Report hian sorkarin 'dan bawhchhiatna hi chhui ngei tur leh sum vir vel dan hai chhuah ngei' ni se tiin a tar lang bawk.

.

Ethics Committee-in hma lak dan tur a rawtah hian, "Mahua Moitra, MP hi Seventeenth Lok Sabha Member a nihna hi paih theih a ni" tiin an ziak.

.

Nimin tukah khan Moitra-i hi Parliament-ah a kal a, thu thar lakhawmtuten hmaah, "Maa Durga a lo kal ang! Kan hmu dawn a lawm, chhiatna a lo thlen chuan hriat fiahna a thi hmasa thin," a ti.

.

Trinamool hruaitu, Bengal Chief Minister ni bawk, Mamata Banerjee-i chuan roreltute a sawisel nasat ṭhin em avangin BJP-in Moitra-i hi paih theihna tur an ruahman niin a sawi a. Mahse, he thil hian inthlanah a pui ang," tiin a sawi.

India ramah hian kum 2024 Lok Sabha inthlanpui hi thla tlem chauhvin a dang tawh a ni.

Source : Zalen