MANIPUR BUAINA LEH BJP

MANIPUR BUAINA LEH BJP

Part-1

~Zairemthanga

Manipur buaina chuan BJP a vaw chau dawn hle niin a lang. News24 in mipui eng emaw zat ngaih dan a lakah chuan 2024-Lok Sabha inthlan lo awm turah hian BJP an hniam hle a, eptu pawl intel khawm, tun hmaa United Progressive Alliance (UPA)  ni thin, tuna INDIA ti-a invuah ta, Rahul Gandhi, Arvind Kejriwal, Mamata Banerjee leh tun hmaa Ui leh Kel thlun pawlh ang maia inhãl Laloo Prasad Yadav leh Nitish Kumar te thlenga tangrual pawl hi an len viau rin a ni. An inbeih tâwk hle ringtu tlemte an awm bawk a. Third front hi chu a lo piang ta a nih pawhin an lian thei dawn lo hrim hrim. 

Ram chhung hmun hrang hrangah Prime Minister Narendra Modi leh a party BJP duh lohna a nasa chho mek a, a duh lotute tawngkam pawh a na thak thak hlawm hle. 'Thi rawh' tiin PM Modi leh Smriti Irani te anchhia an lawh bawrh bawrh mai. Nu pakhat chuan, 'India ram chhanchhuak tur leh humhim turin mi pakhat chiah kan nei a, chu chu Modi hi a ni' a ti a, a chhan an han zawh chuan, 'bang sela, Ram hi a him leh a ni mai' a ti keuh.! BJP te thil tum chu Hindu zingah ngei ngei pawh duh lo an tam ta hle a, Haryana ah te, Madhya Pradesh ah te pawh BJP hi an hniam hle turah ngaih a ni mek. Manipur buaina pawh hi lalna leh thu neihna duh BJP te thluak vawrh virah an ngai vek a, tun thlenga Biren Singh-an CM dinhmun a la luah theih danah hian thil fel lo a awm ngei niin an ngai a ni. 

Ram pawna thil thlengah India sawrkar chu a che rang thin hle a, tawrhpuina leh tanpuina pawh an thawn zung zung thin. Mahse, Manipur buainaah erawh an reh hmak si a, India mipuite hian an hre thiam thei tawh tlat lo a ni. India ram hi Hindu lal ramah siam an tum a, chu chuan an mit a ti del tlat a, an beng a ti ngawng tlat a, Kristiante biakbuk an suasam a, hal a nih lai pawhin an ngawi hmak a, tunah chuan Muslim te thlengin zohnahthlak leh Kristiante thlavang an hauh ta mek a ni. BJP thlawp zawnga tawngkam la nei ang chi phei chu an kawk sawk sawk tawh mai a, BJP hian India ram hi a sawp chhe mek niin an ngai a ni. Sakhaw zalenna ram tihte chu a thu chauh a ni tawh mai. Sawi tawh angin Hindu zingah pawh BJP leh a sangawizawnpui RSS te duh lohna hri a leng chho mek a ni. 

Mi tam takin saruak thlalak darh ta avang khan zohnahthlakte an thlawp a, film star te pawhin ngawih an chuh thei lo a, television star Urfi Javed phei chuan #Kuki #Manipur tih ziak a keng nghe nghe a ni. Khawvela Democracy Ram lian bera thleng atan chuan zahthlak an ti a ni. PM Modia'n, 'ka rilru a na takzet a, ka thin a rim takzet a ni' tih a sawite chu an hre thiam lo a, 'rilru nat hun a ni lo. A taka chet hun a ni' tiin an ãn khum nasa mai. 'PM Modi hian a sawrkar an pawngsual tur hi a veng tlat a, kan farnu leh kan fanute pawngsual tur erawh chu kan ven turin a dah hmiah' te an ti bawk. 

A sei dawn tlat. Chhiar duh in awm chuan kan la chhunzawm leh dawn nia.

Chhunzawmna