MYANMAR RAM A KEH DARH ANG EM?

 – ℱamilia ℱanai ℒalṭansanga

Myanmar President General (Rtd) Myint Swe chuan, “Myanmar sipai (Tatmadaw) in Shan state-a hel pawl 3 inzawmkhawm a tukdawl thei lo a nih chuan Myanmar ram hi keh darh thei dinhmunah a ding a ni,” a ti mauh mai! He thu hi Myanmar sipai sawrkar emergency meeting-a a sawi a ni. Myanmar rama sipaiten mipui thlan lal, Aung San Suu Kyi kaihhruai NLD sawrkar an paihthla a, thuneihna an lak aṭanga kum hnih leh a chanve hnuah Myanmar sipai sawrkar chuan chaurau ek a thai ṭan ta niin a lang.

October 27, 2023 khan China ramri hrul Shan state-ah Shan rama hel pawl 3 inzawmkhawm (The Brotherhood Alliance) chuan Operation 1027 neiin Myanmar sipaite an inkap nasa a, Myanmar sipai commander, Brigadier General Aung Kyaw Lwin a thi nghe nghe a. Ani hi Myanmar rama sipaiin thuneihna an lak hnu lama indonaa sipai thi lal ber a ni.

November ni 7, 2023 khan Karreni resistance force te huan Kayah State-ah beihpui an thlak ve leh thung a, Operation 1107 hian Kayah state pum chu an la ta niin an sawi. Mandalay Region-a Madaya Township-ah pawh an inkap nasa a nih hi. Mandalay khawpui chhung a ni lo tih hriat tur.

Aw, Myanmar rama state hrang hrang hming ka han lam den den ang e.

1. Thaninthayi state

2. Kayin state

3. Yangon division

4. Bago division

5. Ayeyarwaddy division

6. Mon state

7. Kayah state

8. Rakhine state

9. Magwe division

10. Mandalay division

11. Shan state

12. Chin state

13. Sagaing division

14. Kachin state

Myanmar ramah sipai sawrkar leh mipui an indo ta chu a ni ber mai a. Hel pawl tam namen lo an awm bawk a. Eng tin nge sawrkar hi a la kal theih tih hi ngaihtuah tham fe a tling a ni. Hel pawl chu ka’n chhiar chhin mah teh ang - Karen, Kachin, Kareni, Chin, Wa, Kokang MNDAA, Palaung@ Ta’ang TNLA, Arakan Army, leh a dangte… kutzung ṭang thliahin a daih lo. Ke zungṭang thliah leh a ngai dawn tlat! Khaw tin deuh thaw-ah Mipui Venghimtu Sipai pawl (People’s Defence Force @PDF) an la awm zui! Myanmar sipai sawrkar tan tihngaihna tak a awm thlawt lo a ni.

Shan hel inzawmkhawm, The Brotherhood Alliance chuan ram an la duai duai a, military post 100 leh khawpui 4 an la tawh a, sipai unit khat phei chu hel pawl kutah an inpe tawp a. An khawpui lak zinga Chinshwehaw leh Hsenwi khawpuite phei chu China ram chhun kawngpui pawimawh tak Muse kawng aṭanga China ram luhka, ramri insumdawn tawnna khuate an ni lehnghal. Myanmar ram hian China ram aṭangin châk a la nasain pûr a chaw hnem hle a. United States Institute of Peace think-tank chuan “China leh Myanmar ramri insumdawn tawnna za zela 40 vel zet hel pawlin an lak tak khuate kaltlang vek a ni a, Myanmar sipai sawrkar sumhnar pawimawh tak a ni,” a ti. China ram chhun kawngpui leh luhka ber hel pawl kut a tluk chuan ‘thu a tawp e, Lumam’ tih ang vel a ni. International Crisis Group senior Myanmar adviser Richard Horsey sawi dan chuan tun hi Myanmar sipaiten thuneihna an lak hnu lama an dinhmun chhiat lai ber a ni hial awm e.

Shan State, Kayah, Chin, Rakhine, Mon state, Sagaing leh Magwe region-ah te PDF lam, Mipui sipaiten ram an la duai duai a, Economic Times (India)-in a sawi dan phei chuan Myanmar ram zatve (50%) lai hi Mipui sipaiten an la tawh hial awm e, a ti a ni.

Shan ram hel pawlin Myanmar sipai an do ngamna chhan hi China mitmei an hmuh vang a ni thei ang. Eng vang nge tih chuan Shan ram-ah khian ram dang aṭanga lo lut internet & online-a inbumna lam sumdawnna lian tam tak a awm a. Heng internet fraud lam buaipuitute hian China rama mipuite hi an bum hnem ber a, China sawrkarin a ning ve ta ngang a, heng mi bum hmang ho man thei turin Shan hel pawl hi a thawhpui a ni thei bawk e. Shan ram hel pawl hlawhtlinna chuan Myanram state hrang hranga hel pawl ti ila, mipui pawl a nih zawk mah ang chu a tiphur thar a,  hmun tin hmun tangah sipai an do ta a, khawi lai indona chanchin ber nge ka sawi tak ang tih pawh hriat a harsa ta. Mak ve deuh mai chu India ram foreign policy hi a ni a, Burma ram a nih lai ata tawh Myanmar sipai sawrkar (military Junta) khi a thlawp tlat zel a nih chu. Tun ṭumah pawh a la thlawp cheu! Rihkhawdar, Khawmawi, Tuibual-a police ho Mizorama rawn tlanchhia te pawh helicopter hmangin Manipur ram Moreh-ah a han dah a, chuta ṭang chuan Tamu khuaa Myanmar sipaite kutah a hlan ta a ni. TBC tih hi Tlau Tuibual chhuak tihna a ni a, Zahau hnam taw peng an ni.

Khawvel ram ropui leh hausaten Myanmar ram hi an sanction avangin economic lamah Min Aung Hlaing kaihhruai sipai sawrkar hian harsatna a tawk mek a, eirukna a hluar bawk si a, foreign exchange a tlachham ta a ni.

Burma ram hi 1824 aṭang khan British-in a then a zar a lo awp ṭan a, 1886 kum aṭang phei chuan a ram pumin a la ta a, ‘British Burma’ tih a lo ni ta a, January ni 4, 1948 kum khan independence hmu-in Lower Burma, Upper Burma leh Frontier Area ( tlang mi te ) nen inzawmkhawmin ram pum khat, ‘Union of Burma’ a lo ni ta a.

Prime Minister hmasa ber U Nu hun lai khan nasa takin hma an sawn a, South East Asia rama ram changkang berte zinga mi a ni hman a. Buh leh bal an thawnchhuak hnem a, tualṭo Teak a tam bawk a, ‘Rice bowl of Asia@ Asia khawmualpui chawthleng’ tih a ni ṭhin a. Singapore ram siam ṭhatu Lee Kuan Yee khan kum 10 chhunga Burma ram tluk a tum kha a ni a. Ram hruaitu ṭha chuan nawhchizuar veng kha khawvel ram ropui leh changkangah Singapore ram chu a siam ta a nih hi le!  Singapore ram education system mawlh mai khi a ropui thlawt e. Naupang hi mathematics, science leh English an thiamtir vek. Heng subject pawimawh pathum thiam tan chuan ram inrelbawlna dikah rethei pachhia, BPL (Below poverty line) a awm theih loh.

U Nu khan inthlan vote zawn nan Burma ram hi Buddhist ramah ka puang ang a ti ta mai a, U Nu chu kum 1960 kha President atan thlantlin a ni a. Tlang mi tam tak, Kristian ten an duh ta lo va, Panglong Agreement-ah khan kum 10 hnu-ah duh chuan indan theih tih dan tlawhchhanin in dan an tum ta fur hlawm a. Chu lai boruak sa tak chu remchanna leiin General Newin chuan sipai chakna hmangin 1962 kum khan sipai sorkar a din ta a.

Myanmar sipai lal General Newin khan Burmese ways of Socialism kum 40 aia tam mah a kalpui chhung zawng khan “Political power grows out of the barrel of a gun” tih bawk hi a ni a changthlan, a thupui leh a thunawn chu ni! Mipui duh dan ngaipawimawh ni se, a banna a rei tawh khawp ang. Mipui duh dan aiin ama duh dan anga sipaiin thuneihna pumhlum an neih theih nan mipui rikrapa awp beh a duh a, kum 40 a awp bet a. Kum 40 chhung hian a inkharkhip tlat a, khawvel ram ropuiten an ensan vek titih a, a tuartu chu mipui an ni.

‘A hnu hnung hnung Phug seh’ tih ang chiah kha a ni a, Myanmar ram pem chhuahsan hmasa apiang an nihlawh ting mai a ni. Yangon American Embassy-a thawk mi pakhat chuan, “Chin state-ah khian mihring an la awm em?” a ti e, an ti. A awmzia chu Chin state aṭanga US pem thla an tam tawh lutuk a ni. Chin musician & composer ropui, Salai Thuah Aung hlaah, “Run ngha bang kir soh sal ni um pei maw?”, Run lui sangha anga Chin Hills-a dar ang let leh ni awm tak ang maw? a ti hial a ni. Khawvela ram ropui ber leh hausa ber America ramah cheng mah se, a rilru ngaihtuahna chu Lai ram, Chin Hills-ah a cheng reng a, a pian leh sei lenna Run lui kama Lungbang khua a ngai em em a, nimahsela, Myanmar ram sipai sawrkar avangin a pianna ram chu let lehna tlak a ni tawh mawlh si lo.

Aung San Suu Kyi pawl NLD kaihhruainain Myanmar ram chuan democracy lamtluang a han zawh ṭan ve dek dek a, “Hraite, kal chhet chhet, artui hlawh hlawh, Tumbailek, tumbailek” an tih mek laiin Sipai thuneitute duh anga an duan ṭhat 2008 constitutional referendum chungchang NLD lamin an sawisel avangin kumin February ni 1, 2021 khan The Tatmadaw (Myanmar Armed Forces) chuan martial law puangin thuneihna a la leh ta a, Myanmar ramah thim a zing leh ta a ni.

Kum 2 liam ta, Myanmar raltlan tam tak Mizorama an lo luh chum chum lai khan New Delhi-a journalist pahnihin ni tla vanvuaiin Burma ram buai chungchang min rawn interview a, mipui tan beiseina awm tur zawnga thu sawi turin min beisei a, ka sawi thei lo. Myanmar rama ṭhalaite tan ram danga pem vat a fuh ber. Myanmar sipai suala sualzia chu ramhuai aiin an sual zawk daih tih ka hrilh. 

“Democracy is a government of the people, by the people and for the people” tih Abraham Lincoln thusawite kha chu Myanmar sipai hotute hian a rim a ra pawh an hre lo. “Tatmadaw (Myanmar sipai) is the ruler of the people” tih kha Myanmar Socialist Lanzin party innghahna lungpui (Ideology) chu a ni. He ngaih dan hian Myanmar sipai hotute thluak a luh laklawh tawh a, thuneihna an chân vaih chuan an thi dawn si a, thih ai chuan silai chakna hmangin a theih chin chin thuneihna an chelh reng ang. He thu sawi tur hian Zawlnei nih kher a ngai lo. “Ka vaibel” tih tluk zetin ka hre chiang a ni. Kawl fin kherekzia chu mak tak a ni a, ‘phakar’ tih hi “Kawl ngyan” lakah chuan chu nêp te a ni.

Buh leh bal hnianghnarna ram, leilung hausakna ram Myanmar chu kum 2020 khan Human Development Index-ah khawvel ram 189 zinga a mawngphah lam 147-na a ni a, khawvel ram rethei te zinga a hmatawngah a ṭang thung. Politics kalsual rapthlakzia chu sawiin a siak lo ve.

A tawp ber atan thu nawi tlem ka’n sawi ang e. “Mizorama dil lian ber chu Rih dil a ni a, Burma ramah a awm,” tih ziak ang khan Mizote rilru hi Burma ramah a cheng reng a, kan ngaina a, kan lainat a, kan inzawmna hi a lo ril hle a ni. Kum 1956 khan Burma sipaia ṭang Mizo 6500 lai an awm. Chu ringawt pawh chuan kan inzawmna nghehzia a tar lang chiang e. National leh geological boundary, ramri hian min daidang hauh lo mai. Myanmar ram buai avanga raltlan tam tak Mizoram sawrkar, YMA, leh NGO hrang hrang leh mipui mimirin kan lo dawnsawn dan hi mak tak leh ropui tak a ni a, hei ngei hi a ni Zo nun mawi chu. I chhawm nung zel ang u. Myanmar raltlan te hi political refugee mai an ni lo va, economic refugee an ni fawm tih hi hriat nawn fo tur a ni.

Rihkhawdar leh Khawmawi aṭanga Zokhawthara raltlante pawh mahni in leh lova kir zai an rel ṭan mek e.