SUDDEN-OUTLAWED-12

Thlaler leh ramhnuai vêla rei fe an khawsak hnu chuan khawpui chu an han lût ta ngei a. Khawlaiah chuan cowboy, pawisak neih loh hmel tak tak hian mi chìl pawh pawisa lo ni àwm tak hian an sakawr te chu chak deuh deuh hian an tlantir puat puat hlawm a. In ṭhenkhat tukverh aṭang te chuan music hi a rawn ri chhuak ruai ruai hlawm bawk a. Sam-ate chu Karson-a thlenna Hotel-ah chuan an va innghat ve ta nghâl a.

Sam-a chuan Sudden-a hnenah chuan a duh chuan lengvâk vêl turin a ti a. Han len chhuah vêl chu Sudden-a chuan a châk teh chiam lo va; mahse, a chhuak ta tho a. Palace Saloon an tihah chuan a va lût ve ta rawih a. 

Bar-ah chuan zu in hi an lo ding ve fur hlawm a. Mi pakhat hian, “Mikhual i ni maw?” a rawn ti ta chawt a. 

Sudden-a chuan, “Dawithiam emaw i nih chu le? I va han hre thei zâwk ve le?” a lo ti ve mai bawk a.

Chu pa chuan, “Ni lo ve; mahse, heta zu in ṭhinte hi chu kan inhre deuh vek alawm. A neitupa Nick Dinagh-a hian Dollar maktaduai aia tam a nei asin,” a han ti teh ngawt a.

“Nei teh mah se eng nge? Kei pawh, chu aia tlem chu ka nei ve tho alawm,” Sudden-a chuan a lo tihsan leh mai a.

Chu pa chuan fiamthu deuh hian, “Ka ring a ni. Kei pawh chutiang vel chu ka nih i ring lo maw?” a han ti leh a. 

Sudden-a chuan, “Nang maw? Engah mah ka ngai lo che,“ a tihsan ta hmiah a. 

Chu pa chu a kal ta nal nal mai a. Chu pa dinna hluiah chuan pa tawi deuh leh thau lam deuh, inti pawimawh àwm deuh hi a rawn ding leh a. Inti pawimawh hmel fahran hian, “He khaw Marshal hi ka ni asin,” a rawn ti a.

Sudden-a chuan a'n en vang vang a, “Lo ni teh reng pawh ni la, engtin nge awm se min tih? Khur chiam se min ti em ni?” a han ti ha a. 

Marshal hmai chu a sen tan tan mai a, “I tih loh tur ka hrilh ang che. Chu chu i silai pai kha a ni; Danin a phal lo. Chuvangin, min han pe rawh,” a ti ta a.

Sudden-a chu a meng zim ta san mai a, “Buaina hi ka duh lo a nia," tih pahin in chhunga awm ve dangte chu a han melh kual vêl a, mi tin deuhthaw chuan silai chu an lo pai fur si a, "Engah nge, kei kher kher chu a ṭan nan hman min tum? Mi dangte saw lâksak la, tichuan, ka lo inngaihtuah ve ang e,” a ti ta hmak a.

“Nang chu lo kal thar i ni a; anni saw chu ka hriat sate an ni,” Marshal chuan a ti ta rawk a.

Sudden-a chuan, “An ni maw? Mahse, keiin hre ve hek lo i... A enga pawh chu ni se, ka silaite hi chu ka lo kawl rei ve tawh a, ka ngaina riau mai a, han thlah mai chu harsa ka ti viau a ni. Zu hi in ve mai la, a ṭha zâwk lo'ng maw?” a ti ta a.

Marshal chuan Sudden-a mitmeng chu a han en vang vang a, tichuan zu in ve mai chu ṭha zâwk dawnin a hre ve ta a ni chek ang chu, “Buaina i siam êm lo'ng chu maw,” a ti a, tichuan, zu chu an in dun ta zâwk a.

Sudden-a chuan, “Marshal, miin min tih ṭhat phawt chuan kei chu beram no ang mai ka nia,” a tihsan ta a. A no a han tlâk vêl lai chuan Marshal chu a kal sawn leh ta mai a. 

A hnu lawkah chuan Sudden-a chu a han hawi phei a, Marshal leh Boudry-ate ṭhiandun lo inbe lai hi a va hmu ta a. An rawn hnai a, “Marshal, he pa hi a nih hi, Texas velah chuan ‘Sudden’ an ti a. Rûk hmang leh tual thah ching a nih hi,” Boudry-a chuan a rawn ti ta pung pung mai a.

Sudden-a chuan, “Marshal, kha pa kha Monte Jack, Kansas khawpuia pawisa khelhnaa mi pakhat, a bum hrep hnua dawhkan hnuai aṭanga a kah avanga an ûm chhuah a nih kha,” a lo ti ve nghâl zat bawk a.

Boudry-a chuan, “Dâwt a nih chu!” a lo ti vat a.

Sudden-a chuan, “Hei hi chu dâwt a ni lo alawm,” tih pahin Boudry-a biangah chuan ri ṭhuai khawpin a han beng ta mai a. 

Boudry-a chu a pai chawn chawn mai a, zu zawrhna dawhkan chu a va nek rawk rawk a. Chutih lai chuan a zakhnuaia a silai chu a han chuh dawn rawk a, a ṭhianpa Davy-a chuan, “Â â teh suh Monte, a that mai ang che,” tih pahin a lo kuai hrang ta thuai a.

Chutia 'Monte' tih hming han lam rîk tâkah chuan Marshal chuan a silai chu a han phawi thuai a, “In kahna a awm pawhin keima'n ka kâp ang. In inngeih lohna chu pawnah va sawi rem rawh u,” a lo ti ta thuai a.

Sudden-a chuan, “A ṭha. Naktûk zing dar riatah kawtthlerah ka lo chhuak ang a, i dâwih vanga i lo tlanchhiat hman loh chuan kan intâwk ang,” a ti ve ta a.

Sudden-a a va haw chuan Eden-a hnenah khaw chhunga Boudry-ate ṭhiandun awm ve thu chauh chu a hrilh a. Eden-a chuan, “A ṭha a nih chu. A pawisa ka bat pawh ka rul thei nghâl dawn tihna a ni mai alawm,” a lo ti mai a.

A tûk zingah chuan Abelene khua chu a ruah hian a ruak huai mai a. Mi tlem tê huaisen deuhte chu Sudden-ate intawhna tur kawtthler sirah chuan an ding hlawm a. Mi dang en châk ve site chuan tukverh aṭangin an thlir ṭhuap hlawm bawk a.

Dar riat rîk vêlah an Hotel thlenna aṭang chuan Sudden-a chu a lo chhuak ta a. Kawtthlerah chuan a lo chhuk a, kawtthler lehlam yard za vêl dawnah chuan Boudry-a pawh chu a lo chhuak ve mek bawk a. A entute chu an ngawi ṭhuap mai a, an thaw dep dep hlawm a. 

An inpan dun ta a; chutih lai chuan silai a rawn ri ta ṭhuai mai a, Sudden-a lukhum chu a leng nghâl lawp bawk a. Silai rîkna lam chu en mang lovin Sudden-a pawh chuan a han kâp ve nghâl thawr bawk a.

Kawng sir bathlara pa pakhat chu a eu nghâl awrh a, a puakruk ken lai chu kawngah chuan a rawn tla ri thlawrh a, amah pawh chu a tlu ta nghâl a. Tichuan, Sudden-a chu lukhum pawh khum ta lo chuan a kuta pistol ti vir miai miai chung hian Boudry-a lam pan chuan a rawn pên phei ta zel a.

Chutia a ṭhianpa Davy-a nena an thil lo ruahman a han hlawhchham tâkah chuan Boudry-a chu a zam nasa ta mai a. Engah kher kher nge Davy-a chuan a lo kah ṭhelh mai chu le? Engah nge maw lan pawh a lo lan reng reng chu le? A’n hawi phei lah chuan Sudden-a chu a rawn pên phei zel bawk si a, an inkar lah chu a tawi sâwt nasa tawh mai si; hlam sawm.... hlam ruk.... din pawh chu a tum lo emaw ni le?

A tawpah zawng, a silai chu a paih tawp a, a ban phar chungin a tlanchhe ta chiam mai a. Eng tikah tak silai mu chuan min rawn fuh ang maw ti rilru chungin a tlan ta zel a. Sudden-a lah chuan kâp ta nge pawh chu a ti bîk lo va, hmuhsit hmel tak hian a en zui ta reng ringawt a.

A entuho chuan Sudden-a chu an rawn bawr ta ṭak ṭak hlawm a. Davy-a chu a mit leh mit inkarah tak silai mu chuan a fuh hi a lo ni a, a thi chiang hle mai tih te rawn hrilhin an rawn chibai sap sap hlawm a. 

Sudden-a chuan amah ngai sangtute chu han relh rûksan pawh harsa a ti hle a; mahse, chhuanlam siamin engtin tin emaw chuan a relh rûksan thei ta hram a.

Hotel a va thlen chuan Sam Eden-a chuan thil awm dan chu a lo hre vek tawh a, “Jim, i that lo chu a ṭha e. I thah mai zawngin ka leiba min rulhsak teh chawk a chang dawn si a,” a lo ti vat a. 

“Ka la rulhsak tho maithei che asin,” Sudden-a chuan a lo ti ve mai a.

Sam-a chuan, "Min la tihbuai cheu i ring elo?” a lo ti hu a. 

Sudden-a chuan, “Rul chu min chuk thei lova siam dan kawng khat chiah a awm a,” a ti leh mai a, chu chu Karson-a chuan a lo Amen-pui ve hle mai a.

Bâwng rual chu Sam-a hote chuan him takin an lo veng reng a, Karson-a chuan a lei ta a. Dollar sanghnih leh zahnih inpe tur chuan an tifel ta a. Tichuan, khawpuiah chuan an kir leh a, pawisate pawh chu an inpe fel nghâl ta vek a. 

Sam-a chuan pawisa chu Bank-ah dah mai lo chuan a ak ta tlat mai a. A hote’n Bank-a dah an han sawi màwi deuh pawh chuan, “Hemi min lâksak tum chu an buai ve hle ang,” a ti a, a silai pai lai chu a khawih roh roh mai a.

Chutih lai chuan Boudry-a chuan Navajo-a kha a lo va zawng hmu tawh a, Mexican zu zawrhna pindan chungnungah chuan an lo inrawt phur thar leh nasa tawh mai a. Boudry-a chuan, a thil tih tum dan chu kimchang tak hian a han hrilh malh malh a, a tawpah chuan inthurual tak chungin mahni hmun tur lam panin an inṭhen leh ta thuai a.

Chumi zan chuan Palace Saloon an tihah Sam-a leh Sandy-a chuan mi pawisa khel lai hi an thlir dun a. Chutih lai chuan Mexican naupang hi a rawn lût a, Sam-a hnenah chuan, “Mr Green-a’n pawnah lo chhuak thuai teh a ti,” a rawn ti sap a.

Sam-a chuan Sandy-a chu han kalsan mai hi a tum a; mahse, Sandy-a chuan a zûi ve ta vat a. Sam-a'n, “Lo kal ve duh kher suh,” a tih pawh chuan, “Ka lo kal dawn, Jim-a’n i mei ang maiin zûi zel rawh min ti a ni,” a ti tlat mai a, a zûi chhuak ve ta a.

An chhuak chiah tih chuan, mi lo phe vuai hi an han hmu hman chauh a, Sam-a chu an vaw thlu ta tawp mai a. 

Chu veleh Sandy-a chuan a lo beitute chu han beih ve nghâl mai hi a han tum a; mi pathum hian an rawn beih rawn nghâl ta chat a. A theih ang tawka au chel chul chung chuan a han leng vak vak a. A hnung lam aṭang chuan a hriat hnu aw ngei hi a han hria a, a lehhawi dawn chiah tih chuan, a lu-ah silai kawm hian an rawn vaw leh ta chawrh mai a. Sandy-a pawh chu eng mah hre lo chuan a tlu ve ta a.

Rogue-a emaw Navajo emaw zawnga Sudden-a vakvêl chu chutih lai chuan a lo thleng ve chiah a. A han en chian chuan Sam-a pawisa ah lai zawng zawng chu a lo awm ta hlek lo mai a. Karson-a pawh kha a rawn thleng ve thuai bawk a, Hotel-ah chuan Sam-a leh Sandy-ate chu an zawn lût ta nghâl a.

In chhung an han luh chuan Aunt Judy-i chu a lo thinrim êm êm mai a. Carol-i a bo vanga mangang a ni zawk mah a; mahse, Sam-a leh Sandy-ate chu a lo sil fai nghâl sawk sawk a, an hliam te chu a lo tuamsak thuai thuai a.

Sudden-a erawh chu Carol-i a bo tih a hriat veleh chuan a chhuak ta vat a. Naupang pakhat, Carol-i bo hma lawka Carol-i hnena lo kal kha a va hmu fuh a, a tirtu chu a zâwt ta a. 

Naupang chuan, “Sawi lo la, dollar khat ka pe ang che min ti a, min pe bawk si a,” tiin a sawi duh dawn lo va; mahse, Sudden-a chuan, “Sawi la, dollar nga ka pe ang che,” a ti ve ta thung a. Tichuan a sawi ta a, “Lily Gold-i an ti mai ṭhin a, Mammy Potter inah, a chhawngah a awm,” a ti ta a.

Sudden-a chu Hotel-ah chuan a va kir leh a, Sam-a chu a lo la harh lo va; Sandy-a erawh chu a lo harh tawh a, “Jim, Navajo hote an ni ngei mai min beitute kha, a aw pawh ka hria a ni. Carol-i an ru tawh bawk si a, engtin nge kan tih dawn?” a lo ti a.

“Hetah hian nang chu i lo awm ang a; kei chuan Carol-i ka zawng dawn,” Sudden-a chuan a ti a, a thil va hriatte chu a han hrilh ve a. 

Aunt Judy-i'n kal ve a tum ta a. Sudden-a chuan a han hnial dawn dêk dêk a, “Jim Green, min hnial lo mai teh; kal ka tum tho tho. Mipa zawng i ti thei viau pawh a ni maithei; mahse, hmeichhia zawng, hmeichhia bawkin kan ti thei zâwk,” a lo ti ta tlat a.

Lily Gold-i awmna in an va thlen chuan, Hotel nghâktu chuan, “Lily Gold-i’n tu mah a hmu duh lo,” a lo ti a. 

Sudden-a chuan, “Min hmu duh ang,” tih pahin dollar khat hi a han rawlhruk zauh a, an chho ta a. 

An han luh chuan Lily chuan mei hi a lo zu hlat hlat mai a, “Tu pherh hrep nge maw in nih le?” a lo ti khar khar a. 

Sudden-a chuan, “Tute nge kan nih zawng a pawimawh lo. Miss Eden-i awmna kan hre duh mai a ni,” a han ti a.

Lily chuan, “Ka hre awzawng lo mai,” a lo ti ta tlat mai a.

Sudden-a'n a han zawh leh hauh hauh pawhin Lily chuan a sawi duh chuang hlek lo mai a. Chutah zawng, Aunt Judy-i thin chuan a tùar ta lo va, Sudden-a chu a han nam kiang dawrh a. 

“Khawi nge, keima'n. Ngaithla rawh, zu hmun mi hur-nu. Injun hovin nangni ang mi hur hi an tih dan i hre tawh em? An hnar an hlehsak ṭhin a, ka hmu ve tawh a ni. An hmel chu a tiṭha teh chiam lo hle asin,” tih pahin a kut vei lamin Lily dàrah chuan nghet zet mai hian a han ṭham ta mai a. 

A ding lam chuan chemtê, inches riat vêl tur hi a han vilik zeuh zeuh a, "Sawi vat mai rawh, mi hur-nu. I sawi loha i sawi loh vaih zawngin i hmai kha mipa en ngam loh khawpa ka siam loh nâka leh,” a ti leh ta khur khur mai a.

Lily chuan chu nu chu a’n en thin a, a meng rum ul mai si a, a hlau ta em em mai a, “A ti tak tak duh ang. Kal sawn tir teh, â a nih hi,” a ti ta chul a. 

Sudden-a lah chuan, “Ka inrawlh dawn lo, nangma thu thu a nih chu!” a lo tihsan mai si a. 

“Hetia in thil tih dan hi hria se zawng an khai hlum duh ang che u,” Lily chuan a ti ta ringawt a.

Aunt Judy-i chuan, “Nih pawh a ni ang; mahse, i hnar zawng an vuahsak tawh hlei lo'ng che,” a lo ti a, a chemtê chu Lily hnar bul vêlah chuan a han vilik kual vel ṭhin a. 

Tah zet zawng, Lily chuan a zêp ngam ta bîk lo va. Mi pahnih (A han sawi hmang chuan Boudry-a leh Navajo-a) an ni a. Mexican zu dawra hruai turin an ruai a, an chhuanlam chu, Sandy-a a inhliam na hle tih a ni. Tah chuan chu mite pahnih chuan an lo man a, an tlan bopui daih tawh tih te chu a hrilh ta a.

Sudden-a chuan an kalpuina lam te chu a lo zâwt nghâl vat a, “Engtin nge ka hriat ang,” Lily chuan a lo ti thuai a. 

Mahse, Aunt Judy-i chuan, a mit bul lawkah chuan a chemtê chu a han vilik leh ta zauh a, Lily chu a ṭe tuarh mai a, “Heta ṭanga mel hnihah sawn in râm tawh tak mai a awm a, chu chu an sawi thanin ka hria. Chu zawng chu a ni ka hriat ve chu; chhuak hmanhmawh rawh u,” a ti ta a.

Chhuah pahin Aunt Judy-i chuan, “Dâwt i sawi a, Carol-i an lo khawih hman vaih chuan, ka rawn zawng leh ngei ang che. Khawiah pawh lo awm la ka rawn hmu chhuak tho tho ang che a, ka thil tum kha ka ti ngei bawk ang. Min khai hlum mah se lawm takin ka tuar mai ang; nang erawh chuan i dam chhungin hmel pangngai i pu tawh lo vang," a han ti zûi hram a.

An chhuah hnua Hotel an va thlen dawn chuan, “Khawi nge, ka sakawr ka va la ang a, Carol-i chu ka va zawng teh ang,” Sudden-a chuan a han ti a. 

A beisei loh ang takin Aunt Judy-i chuan kal ve pawh a lo tum chuang lo va, ṭha deuh hian, “I rawn hruai haw ngei ngei dawn nia aw Jim; nichina ka thil tih dan erawh kha chu tu ma hnenah i sawi dawn lo nia,” a ti ta a.

“I ti ṭha thlawt alawm. Keimah mai ni i la, eng mah ka ang tawp nang,” Sudden-a chuan a lo ti a.

Aunt Judy-i chuan, “Mahse, hmeichhe tih àwm loh deuh pawhin ka lo awm palh ange tih thu-ah le,” a han ti leh hram a, an inṭhen ta a.

Sudden-a chuan a sakawr hnenah, “Nig, sakawr leh ṭhian leh nupui zawng lai tan chuan hmel ngawt hi en tur a lo nih loh hi ti raw?” a ti ta hial a.