SUPREME COURT HEARING AN ȚAN LEH TA
Manipur violence>>
SUPREME COURT HEARING AN ȚAN LEH TA
PART - 1
AUGUST 07, 2023:
Supreme Court chuan Manipur buaina leh a kaihhnawih thu buai chungchang ngaihtuah ( hearing) tur ni a lo ruat tawh angin he thu buai ngaihtuahtu bench chuan vawiin August 7, 2023 hian an ngaihtuah țan leh dawn ta.
Manipur state a Meitei leh tlangmi Chin-Zo-Kuki inkara buaina leh tharum thawhna chungchang thu buai August 1, 2023 khan Supreme Court chuan thu buai theh luttute aiawha ding India ram Advocate chhuanvawr : Kapil Sibal, Indra Jaising etc te hnen ațangin thil awm dan țawngkam leh ziakin tam tak Court hian a hre tawh a. Kuki hmeichhe pahnih saruaka kawng zawhpui Social media a darh phei kha chuan Supreme Court a ti thimrim tak zet a, țawngkam hriam leh dengkhawng tak takin Manipur Sorkar hotute a an khum nghal phiar phiar thu pawh, hemi chungchang ka ziak hmasa lama ka rawn thailan tawh kha in la hriat ka ring.
Supreme Court chuan, "Thla hnih chhung zet chu Manipur-ah hian Sorkar leh sorkar inawpna leh chumia hmanrua zawng zawngte chuan an tih tur ti lovin an hlawhchham fai vek," tiin he buaina vanga thihna, in leh lo halna leh a kaihhnawih tam tak hi Manipur Sorkar a burbun anih kha.
He buaina chhui chian hna pawh "vuaicha" lutuk leh haider luia "mutthluksan" ang mai anih thu Supreme Court Chief Justice DY Chandrachud chuan a ti. (Chandrachur tia lam tur a ni, a tawpa 'd' hi 'ra' a ni e. )
MANIPUR DGP
Supreme Court chuan vawiin hian Director General of Police, Manipur chu Court-a amah ngei inlan turin a ko a. He thu buai kaihhnawih FIR 6,000 chuang an ziah luh tawh sawi fiahna (statement) te, a tuartu thu leh hla (victim's statement) mihring man an neih tawh zat te inring vek tura hriattir kha a ni a, a hna hi a nep viau thei lo.
Supreme Court hian Solicitor General (SG) Tushar Mehta Central Sorkar leh N Biren Singh Sorkar aiawha ding chu eng vanga thla hnih chhung FIR ziak lut loa ti khawtlai nge an ni tih alo chhuahchhal hrep tawh a, Tushar Mehta tan sawi tur a vang hle a, "hetiang information hi ka dawng lo," tih mai loh chu sawi theih a nei lo anih kha maw.
BIREN SINGH THLAWPNA HNUK DAWK
Kuki People's Alliance (KPA) NDA hnuaia awm, N Biren Singh kaihhruai sorkar thlawptu chuan sorkar an thlawpna an hnuk dawk a, Kuki People's Alliance hian MLA seat 60 awmnaah hian MLA 2 an nei. Kimneo Haokip Hangshing, Saikul constituency bialtu leh Mr Chinlunthang, Singhat bialtu MLA te an ni. He thu hian N Biren Singh thinrim a chhem alh zual ngei ang.
POLICE RALTHUAM RAWK
Manipur police-in twitter-a press note a an tar lan danin police station hrang silai leh ralthuam dahna hrang hrang (armoury) chu mipuiin August 5 khan rawkin an hneh chhuh tih tar lan a ni. Hei hian Supreme Court a chhaih kawlh hle ang tih a chiang a, DGP tan thiam thu sawi tur a vang duh khawp ang le.
Chawhnu dar 2:00 PM ațang hian hearing an țan chauh avangin a hnu lam thu zel chu in lo ngaichang mai aniang chu.
Ka chhunzawm zel ang....
=====07082023
Huna Kawlvawm
Comments