THUZIAKMI TE HRIAT ATAN

 THUZIAKMI TE HRIAT ATAN- 

May 28, 2017                                 ~Jack Chhangte

Vanneihna kan ti dawn nge kan phu vang zawk; Social network hmang tangkaiin a peih apiangin thu ziahna remchang kan lo nei ta a. Thenkhatte zarah thu ngaihnawm leh ropui kan hmu ta fo mai. Chutihlai chuan, thuziak uluk tulzia hi kan hre lo emaw ni aw tih mai tur- thu post, admin tana approve loh dawn a nuam lo ve riau, chhiartlak lem loh a awm nual.

Hei hi lo hre reng la, lo chhut ve teh.

1. I ta a ni lo

Thuziak reng reng hi published/phochhuah a nih tawh chuan a ziaktu ta ni lovin, a chhiartu ta a ni daih thin a. A ziaktu chuan chan a nei mumal tawh der lo. A chan awmchhun chu mualpho or hmingthat a ni tawp mai.

Hei hi "ziak suh" tihna ni lovin "ziak uluk hle rawh" tihna a ni zawk.

I thuziak kha a chhiat viau chuan nangmah i mualpho a, a that viau chuan a chhiartu a phur thung a, i hming a tha bawk.

2. Narrative leh Dialogue

Article leh story hi thil hrang daih a ni a, ziah dan a inanglo. A bik takin story hi ziah uluk a ngai em em bik.

Mizo lehkhabu fiction bik hi han en vang vang ila; Narative/sawifiahna word aia dialogue/inbiakna han dah a, ropui zawk tur hi a awm nual.

ᅠ A hmelthat zia sawi nana tehkhin thu hman duah ai chuan "an bula awmte awmdan" sawi daih te hi a tunlai thuziak tawh zawk. Direct a thil hrilhfiah lutuk hian thuziak a tiho zawk thei.

ᅠ Thelma thawnthu a Thelma te, Cleopatra te, kha an hmelthat thu direct in an sawi chiam lova, an hmeltha hmel em em tho tlat.

3. I ziah tur hre rawh.

ᅠMizo story i ziah dawn chuan Mizo history i hriat ngei ngei a ngai a. Base nei miahlo pawhin ziak la, a kum hriat ngailo mah se, hmanlai nunphung leh tawngkam i hriat tho tho a ngai.

Engtiklai atangin nge mizo ten Thingpui kan inpek; zu kan inthlit. Bawlpu nge Sadawt in damlo thawi; Thirdeng nge Tlangau chang sang; ramhual, Val Upa tawngkam, Lal tawngkam.

 Hmanlaiin mizo ten kut an beng dur dur thin em, an inchibai nge an inkuah, an infawp ve em. Nula chuan zanah la an kai deuh tlangpui em. Vartian ah sumah buh an deng tuktin a, tuium in tui an chawi leh thin tihte, nula kut kha a bawk thliah thluah vek etc, hriat tur a tam lutuk mai.

ᅠ Tu te nge thingserh sat thin, Lalin mi a that ngai em, Duat deuhin an inbe ngai em, an hmeichhia te an sihhnip em tih te thlenga i chhut a tul. Hmanlai mizo nula te'n mawng an tisawi ve ngai lemlo tih te, an inmelh dan pawh a ruk thei ang ber a ni tih te, Milu lam dan te pawh i hriat a tul ang.

ᅠ Hlado hrang hrang te leh Bawhhla te hriat hran a tul a. Salu hawntu ten hlado an chhamin khuaa pasaltha awm te'n an lo do hian, sa hrang an hleh ve thin tihte pawh hriat a tha khawp mai.

Tun hnai deuh thleng pawha an hman- Ṭingfian te, mirethei leh pem thar te- Lalin inhlawh na'n tuikhur hiahfai leh hnadang an thawhtir a, ṭingfian an hmuh ang ang a buh an khawn thin te pawh lo hre tel la. Upa titi te leh thuziak i chhiar tam a tul e.

4. Hlarua/hlathu tawngkam bik hi- thu uar dawn avanga thu tluang pangngai ah hman ngawt chi a ni lo. Hei hi tam tak chuan thu tihmawina emaw an ti a, tihchhiatna zawk a ni. A hmanna tur bik liau liau a awm a, thuziak mite tihsual tam ber a ni.

ᅠ Khawvela hnam hrang hrang hian hlarua kan nei nalh hlawm em em a. Thuziak lar tham ah chuan tehkhin thu leh fiamthu inbiakna emaw thu dangdai deuh ah chauh poetical word (hlarua) hi an zep thin tih i hmu thei ang. A tullo ah hlarua hman hi thuziak tichhangchhe tu lek a ni.

Khai aw - ↓

e.g (Chu zan #chhawrthlapui eng ruai hnuaiah chuan thuro #ianga zaidam #lanu chu #bahsam thlah_hniangin a ding a. #Chhemdam_thlifim chuan a #bahsam chu a chhem leng siau siau a.)

A thing lutuk ringawt. A thu hi chhiar tlak a ni lo nghal. Heta hlarua ho hian a tichhe vek.

5. Thu tawpna inang put hi thuziak tineptu a ni. Thenkhat thuziak chu "a ni" tih hlir maiin paragraph a tawp zawn zut a. A ti ngaihnawmlo zo thin.

6. Tawngkam ngai hman tam lutuk hi tawngkam leh thumal hre tlem lanna a ni a. Saptawnga ziah hian a awl duh khawp mai. Mizo tawnga i ziak ah thu ngai i hman nawn vak vak chuan hmasawnna tur i la nei nual tih hrethiam ang che.

Thil uar i tumna lamah "mai le!" "mai a" etc i hman fo chuan thu uarna dang i thiamlo tih i tarlang pah tlat a, I titi kalphung i tarlang tel bawk a, a tih fo chi lo.

7. Sentence then fel rawh.

ᅠThu kalhkim pakhat hi sentence khat chu a ni mai a. Chu sentence chu hrihfiah chhawn ngai/theih chi a nih chuan sentence chhungah coma emaw character remchang dahin thun luh a ni thin. Chutia tih loh chuan thuziak a tinawi duh khawp mai.

e.g (Chumi ni chuan indona chu a zual sauh a, te vawng vawng ri leh hriamhrei inkhak ri sawk sawk te, bawhhla chham ri leh thi tur aw chuai raih te, patling insat ri chawrh chawrh thawm leh thinrim te ruai ruai thawm te chu a inpawlh nuai nuai a, ni tla tur eng sen phut hnuaiah chuan pasalthate thisen chuan Saitluk ruam, lasi te meuh pawh an lo chai thinna chu a bual chhuak hneh kher mai.)

ᅠ Hei hi a thuchheh a diklo a ni lo; A thu then a fello a ni zawk. Full stop awmna turah ka dah tlat lo. Hetiang hian thuziak a tichhe vek zel.

8. Fakna Lawm viau suh.

 Thenkhat hi chuan chhiar chiang lem lovin an comment phawt a, an chhiar leh thin. I thuziak a tha em, a nalh em tih lam an chhut lova, an comment thawr zel. I thuziak thatna lai leh thatlohna lai hre miahlo comment hi, a nihna takah chuan, i tan tangkaina a tlem khawp. Hma i sawn phah lova, i phur phah deuh avanga lawm ngawt kha thuziakmi awmdan tur a ni lo. Critics hrethiam turin hawi zau la, i thuziak that tawklohna lai hre tur khawpin chhut let peih rawh.

ᅠ Hetiang an peih loh vang hian kum 3 kaltaa thu ziak tawh, hmasawn lemlo an awm nual a nia.

Duhtawk phawt ang; sei chu a ninawm deuh tlat. Heng point te hi a mala chhui tham vek an ni. Mahse a dang a la tam em a, chhui zau lo mai ang.

Thuziaktu lar tak tak te'n harsatna an tawh dan te, Thuziakmi te ropui bik zia te nen kan la chhunzawm dawn nia.

Part-II