MANIPUR BUAINA- Chihrang Lawrkhawm
Manipur Buaina
Kum 2023 YMA General Conference chu Churachand-pur-ah nghah a ni a, nimahsela boruak ṭhalo engemaw awm thei a hriat anih vangin ṭhulh a ni.
Manipur ah hian Tlangmi leh Meitei (Scheduled Caste) te an cheng a. Meitei te hian Scheduled Tribe nih an kherh leh a, a harsa tawh si niawm a ni. Chuvangin an chenna ram chinah hian an tawt tawh a, ram zauh duhin, Zo-ethnic lam te hi an bei ta vak niin sawi a ni.
Chenna in bakah Biakin te thlengin an suasam a; mi engemawzat thiin, hmeichhia te pawh saruaka kawng zawhpuiin, pawngsual an tawh hnuah tihhlum an ni leh zel.
Mahse Manipur CM leh India PM te chu an la ngawi ta reng a! PM phei chu foreign lamah ala zin ta dah a!
Manipur police te kut atangin silai tam tak a bo tlat mai a; Meitei lam te lah chuan silai tha tak tak an hum ta fur mai. Zo-ethnic lam erawh chuan tualchher silai te an hmang thung.
Nunau te an tlanchhia a, raltlan tam tak chu Zoramah an rawn lut ruih ruih mai. Pa ho erawh chu tlanchhe duh lovin, an ram neih chhun tana ṭan ral raih apwh huamin an pau an tikhauh a!! An va thlamuanpuiawm si em!!
July 2023 a ni a, May thla daih tawh ami hmeichhe saruak kawng zawhpui chu a leakout ta hlauh mai. Hei hian PM ngeng chhunlo mah se, India ngeng a chhun a; Supreme Court lam chuan he thil hi an dodal thu an rawn chhuah ta riap mai!
Delhi ah punkhawm huai-hawt a ni a, nutling 3 chuan PM an rawn au khum ta siah siah mai.
Remna hmetmit tura sipai kal, hotu 2 chu an bo leh ta hmak mai bawk. India hi eng a ti ta nge ni le?
Opposition party an rawn lang. Rahul Gandhi chuan, "I duh dan danin min ko rawh, Modi. India kan ni e. Manipur damna turin kan pui zel dawn a, hmeichhiate leh an fate mittui kan hruksak dawn. Manipur ah hian India nihna diktak kan dinthar leh dawn," (26/7/2023) a ti hmiah mai.
May thla a buaina chhuak tawh kha, hemi chungchang ah hian PM hi vawi khat chiah ala tawngchhuak zu nia!
Eptu lam chuan rorelna inhnihah te chuan, Manipur chungchang sawi ngei turin an phut a. Indian National Development Inclusive Alliance (I.N.D.I.A) chuan sawrkar rintawklohna motion putluh an tum.
(Ava tha dawn ve!)
Mizoram MP neih chhun pahnih Lok Sabha member Pu C. Lalrosanga leh Rajya Sabha member Pu K. Vanlalvena te chuan NDA aţanga chhuah mai an duh thu an sawi.
Akashvani zawhna chhangin MP pahnihte hian Manipur BJP sorkar hnuaia tharum thawhna tihtawp lova a awm avang leh sorkar laipuiin Uniform Civil Code hman a tum ni a a lan avangin NDA a awm reng chu thil ţha ni a an hriat tawh loh thu an sawi a. Thutlukna erawh chu anmahni siam thaih a ni lova, MNF party hruaitute thutlukna tur a nih thu sawiin anmahni mimal ngaihdan leh duhdan an sawi chhuak mai niin an sawi a ni. NDA a awm party MP-te inhmuhkhawmna-ah pawh Manipur tharum thawhna leh UCC chungchang sawi chhuak lo tura tih an nih avangin tun hnai a NDA MP-te inhmuhkhawmna-ah pawh an tel tawh lo.
Pu C. Lalrosanga leh Pu K. Vanlalvena te chuan Manipur Chief Minister N. Biren Singh hi a bang anih loh pawhin Manipur a President’s Rule puan ni se a ţhat zawk an rin thu an lo sawi ve ve tawh a. Chutiang anih loh chuan tharum thawhna tihtawp a ni thei dawnin a lang lova, nunna tam zawk chan a hlauhawm a ni, an ti. Manipur chungchang Parliament a sawiho an duh thu leh chumi atan chuan adjournment motion putluh an dil ve ve bawk a, phalsak an la ni lo. Anni chiah hi NDA MP zinga Manipur chungchang Parlia-ment a sawiho ngiat awm chhun an ni a, a dang chu eptu party MP-te vek an ni. -Source: Click la
Rinloh tak takin, Modi-a demna thu a tam hle.
Military veteran ṭhahnem tak chuan Manipur buainain ni 82 a awh tawh chung pawha buaina chinfel a la ni lo chu sorkar an dem thu Pathianni khan an sawi a, sorkar chu a tihtur ti duh lo leh, buaina chhuaka inhnamhnawihah an puh.
Manipur-a Kuki hmeichhe pahnih saruaka kawng an zawhtir chungchang a sawinaah, prime minister Narendra Modi-a'n Congress rorelna Rajasthan leh Chhattisgarh state-a thil thleng nen a tehkhin chu an dem thu an sawi bawk.
Navy chief hlui leh 1971 war hero Admiral Arun Prakash chuan, "Manipur-a buaina leh tharum thawhna thleng hi a rapthlak takzet. Sorkarin a tihtur a ngaihthah leh buaina chawkchhuaktua sorkar a tel ve hi a buaina chhuak pawi tluk zetin a zahthlak. Hmun danga thil thleng pawh hi engtia tih tur nge? tih zawhna hriat hi kan ning tawh," tiin Pathianni khan a twitter-ah a tarlang.
Prakash chuan, "Sorkar laipui hian a duh huna a hman theih police maktaduai 1.3 leh sipai maktaduai 1.4 a nei, heti chung hian enga tinge Manipur-ah thla hnih chuang tharum tawhna, pawngsual leh in hal a la thlen reng? Tih theih engmah kan nei lo em ni?" tiin June 21 khan a lo tweet tawh bawk.
Lieutenant general hlui pawhin sorlar laipui leh state sorkar chu Manipur mipuite tan a hlawhchham tih sawiin, "State chhungah hian dan leh thupekin awmzia a nei lo a, Manipur chief minister Biren Singh chu buaina chawk-chhuaktu zinga mi nia a lan avangin chhui a ngai," tih a sawi. "May 4-a Kuki hmeichhe pahnihte chunga rawng taka chetna video , July 19-a a darh hnu chauha sorkar a che hian sorkarin a ngaihthahzia leh buaina chawkchhuaktu a nihzia a tilang," a ti.
"Ramchhung hruaitu lu ber leh central minister-te chuan he thil thleng hi state danga hmeichhe chunga pawi-khawhna thleng nen hrut rual tumin an hmanhlel a ni," tiin lieutenant general hlui chuan a sawi a, "Misualin hmeichhia a pawngsual leh, mipuiin tlem zawk thenfai/suat an tumna kawnga hmeichhiate chhunga hleihlenna thleng hi a in ang lo a ni," a ti.
Brigadier hlui pawhin Prime Minister Modi chu Manipur-a thil thleng a sawinaah, hmun dangah pawh a thleng ve tho tia midang puhmawhna politics hmanga Chhattisgarh leh Rajasthan-a thil thleng nen tehkhin a tum chu a demawm tak zet tih sawiin, "Manipur-a thil rapthlak tak a thlen laia hetiang thu a chhakchhuak hi a lungchhiatthlak tak zet," a ti bawk. Source : Click
Khai le! Mihrang hrangten Manipur chungchang an ziahte hi i en thla zel teh ang aw.
Comments